Forca e vërtetë e Copenhagenit, kundërshtarit të Dritës

Trajneri Zekirija Ramadani e di që për t’u bërë “lajm kryesor në Evropë” Dritës i duhet të eliminojë kundërshtarë të nivelit të Copenhagenit. 

Kampionia e Kosovës,  Drita, luan me kampionin danez, Copenhagenin, në raundin e dytë kualifikues të Ligës së Kampionëve. Ndeshja e parë është të martën, nga ora 19:00, në “Parken Stadium” në Kopenhagë. 

Por cili është niveli i vërtetë i Copenhagenit?

Goxha i lartë. Kampioni i Luksemburgut, Differdange, të cilin Drita e eliminoi në raundin e parë kualifikues të Championsit, as për së afërmi nuk mund të “matet” me Copenhagenin.

Pak ditë më parë Copenhageni e transferoi një lojtar te Barcelona. Bëhet fjalë për talentin me pasaportë suedeze, Roony Bardghji. Kjo dëshmon për nivelin që kanë lojtarët e Copenhagenit. Po këtë verë Denis Vavro kaloi nga Copenhageni te Wolfsburgu i Bundesligës gjermane, ndërsa Kevin Diks te skuadra tjetër e elitës gjermane, Borussia Monchengladbach.

Copenhageni mori Youssoufa Moukokon nga Borussia Dortmundi për pesë milionë euro, ndërsa bëri edhe pesë transferime të tjera. Për pesë milionë e transferoi edhe Dominik Kotarskin e Kroacisë.

Copenhageni tashmë ka nisur mbrojtjen e titullit të kampionit në Danimarkë. Të premten fitoi 3:2 në udhëtim ndaj Viborgut.

Mohamed Elyounoussi, Elias Achouri dhe Magnus Mattsson i shënuan golat. Kundërshtari i Dritës është edhe fitues në fuqi i Kupës së Danimarkës. Në fazën përgatitore i luajti katër ndeshje, ndërsa e fitoi vetëm të fundit, ndaj Hamburgut.

Copenhageni, i njohur në Danimarkë si Kobenhavn, ka 16 tituj dhe dhjetë kupa të Danimarkës. Mban rekordin edhe për tituj, edhe për kupa, ndonëse si klub u themelua vetëm në vitin 1992. 

Shquhet për organizimin dhe për bazën e madhe të tifozëve. Mbi 1.000 tifozë të kësaj skuadre ishin në ndeshjen e parë të këtij edicioni në udhëtim.

Përvoja e Copenhagenit në garat kontinentale është po ashtu shumë e vlefshme. Në edicionin e fundit arriti deri në një të tetën e finales në Ligën e Konferencës. U ndal nga Chelsea, që ndërkohë fitoi këtë garë e po ashtu Botërorin e Klubeve më pas. Në nokaut të raundit kualifikues e eliminoi skuadrën gjermane Heidenheim, ndërsa në fazën e ligës përfundoi në vendin e 18-të.

Në edicionin 2023/2024 ishte në fazën grupore të Ligës së Kampionëve, që ndërkohë është zëvendësuar me fazë të Ligës. Përfundoi në vendin e dytë në grup, para Galatasarayt e Manchester Unitedit dhe prapa Bayernit. Në një të tetën e finales ishte eliminuar nga Manchester City.

Në Champions ishte në fazën grupore edhe në edicionin 2022/2023, ndërsa mbeti prapa Manchester Cityt, Borussia Dortmundit dhe Sevillas. Nga garat kontinentale Copenhageni nuk mungon asnjëherë.

Në Champions dy herë ka arritur në një të tetën e finales, në Ligën e Evropës arriti deri në çerekfinale, ndërsa në Ligën e Konferencës deri në një të tetën e finales, po ashtu dy herë.

Gjitha këto fakte e bëjnë Copenhagenin kundërshtar shumë të vështirë për Dritën. Dhe eliminimi i kësaj skuadre vërtet do ta bënte “lajm ndërkombëtar” kampionen e Kosovës.