Sulmuesi i Kosovës, Fisnik Asllani, është shumë i zhgënjyer që skuadra e Elversbergut nuk arriti të promovohej në Bundesligën gjermane.
Elversbergu të hënën mbrëma u mposht në shtëpi nga Heidenheimi me rezultatin 2:1 në ndeshjen kthyese të barazhit për Bundesligë. Heidenheimi e siguroi mbijetesën edhe për një edicion në elitën gjermane.
Asllani pas ndeshjes deklaroi se Elversbergu e meritonte që të promovohej në Bundesligë.
“Në një edicion kaq të mirë, siç e pa e gjithë Gjermania, e meritonim absolutisht. Patëm fat të keq. Dhamë gjithçka por ndonjëherë më e mira nuk mjafton. E përjetuam anën më të keqe të futbollit”, ka thënë Asllani, shkruan “Kicker”.
22-vjeçari Asllani ishte i huazuar tek Elversbergu deri në fund të edicionit 2024/25.
Ai do të kthehet te Hoffenheimi, me të cilin ekip ka kontratë deri në vitin 2026.
Asllani ishte golashënuesi i tretë më i mirë në Bundesliga 2. Në 33 ndeshjet e zhvilluara realizoi 18 gola dhe bëri tetë asistime.
Për Asllanin kanë shprehur interesim shumë klube nga Gjermania si Borussia Monchengladbach, Werder Bremen, Freiburg dhe Stuttgart.
Elversbergu ishte i treti në Bundesliga 2 dhe për këtë luajti në barazh mne Heidenheimin që ishte i 16-ti në Bundesligë. Ndeshja e parë kishte përfunduar baras.
