Harry Kane. Erling Haaland. Romelu Lukaku. Mateo Retegui. Moise Kean.
Në Evropë dhe Serie A qendërmbrojtësi i Interit, Francesco Acerbi, nuk ka lejuar asnjërin prej këtyre sulmuesve të shënojë gola këtë sezon, shkruan “AP” të enjten.
Paraqitja e fundit mbresëlënëse e Acerbit ishte në çerekfinalen e parë të Ligës së Kampionëve në udhëtim te Bayern Munichu të martën. 37-vjeçari, i cili e fitoi betejën me kancerin, bëri që Kane ta ketë vetëm një gjuajtje drejt portës – kur sulmuesi anglez e qëlloi shtyllën në minutën e 26-të.
Njësoj siç bëri me Kanen, Acerbi kishte bërë me Haalandin në ndeshjen hapëse që Interi e luajti ndaj Manchester Cityt në muajin shtator. Ajo ndeshje ishte mbyllur 0:0.
Acerbi nuk e kishte lejuar Haalandin të shënonte gol as në finalen e Ligës së Kampionëve në vitin 2023.
Edhe
Lajm i mirë për Shqipërinë, Italisë i lëndohet qendërmbrojtësi me përvojë
Në të gjitha ndeshjet, Interi ka pësuar tre gola në 11 ndeshje të Championsit, por vetëm dy me Acerbin në fushë, pasi mungoi në humbjen 1:0 nga Bayer Leverkuseni në muajin dhjetor.
Acerbi, karriera e të cilit ishte ndalur për një kohë për shkak të kancerit në testikuj para një dekade, ka qenë efektive në ligën italiane.
Ai e ka ndalur Lukakun dhe golashënuesin më të mirë të Serie A, Reteguin, dy herë – në dy barazime 1:1 me Napolin e Lukakut, dhe në fitoret 4:0 dhe 2:0 ndaj Atalantas së Reteguit. Këto ishin ndeshje vendimtare që Interi ta mbajë vendin e parë në tabelë me 68 pikë, tri më shumë se Napoli, e dhjetë më shumë se Atalanta.
Në fakt, Acerbi nuk e ka lejuar Lukakun të shënojë në katër ndeshjet përballë njëri-tjetrit qëkur belgu u largua nga Interi, përfshirë këtu dy ndeshjet kur Lukaku ishte pjesë e Romës në sezonin e kaluar.
Retegui në Serie A i ka 22 gola të realizuar gjithsej, ndërsa Kean i ka 17 gola.
Kean shënoi dy herë kur Fiorentina e befasoi 3:0 Interin në Serie A, në ndeshjen në të cilën mungoi Acerbi. Kur mbrojtësi u kthye për ndeshjen tjetër ndaj Fiorentinas pas katër ditësh, Kean u ndal dhe Interi fitoi 2:1.
Derisa Acerbi mund të pushojë të shtunën për ndeshjen e ligës ndaj Cagliarit, ai pa dyshim se do të përdoret për të luajtur kundër Kanet në ndeshjen kthyese ndaj Bayernit në “Giuseppe Meazza” në javën e ardhshme.
Edhe
Anglia mbështetet në golat e Harry Kane për sukses në Botëror
Nëse Interi arrin që ta mbajë avantazhin 2:1 nga ndeshja e parë me Bayernin, një tjetër sulmues shumë i fortë i qendrës mund të arrijë në gjysmëfinale apo në finale.
Më pas, Italia e hap kampanjën kualifikuese të Botërorit ndaj Norvegjisë së udhëhequr në sulm nga Haalandi në muajin qershor, ndonëse mbetet të shihet nëse sulmuesi i Manchester Cityt do të kthehet nga lëndimi. Nëse kthehet, Acerbi do të jetë aty duke e pritur.
