Çfarë shkoi keq për Ronaldon në ndeshjen e parë në Kupën e Botës 2026?

Lionel Messi, Kylian Mbappe, Erling Haaland dhe Harry Kane e nisën Kupën e Botës me stil, por çfarë u ndodhi Cristiano Ronaldos dhe Portugalisë?

“Fundi nuk është afër”.
Këto janë fjalët e Cristiano Ronaldos pasi Portugalia barazoi 1:1 me Kongon në ndeshjen e parë në Grupin K në Kupën e Botës 2026.

Dikush e sheh atë si shpresë që Portugalia do të avancojë në fazën eliminatore.

Ronaldo në hije të Messit, Mbappes, Haalandit dhe Kanet

Në një ditë historike, në atë që po shndërrohet në një Kupë Bote historike, 41-vjeçari u bë lojtari më i vjetër në fushë që luan si titullar në një ndeshje të Kupës së Botës - megjithëse legjenda e Kamerunit, Roger Milla, mbetet lojtari më i vjetër në fushë që luan në një ndeshje të Kupës së Botës, duke hyrë si zëvendësues në moshën 42-vjeçare gjatë Kupës së Botës 1994, në të cilën ai gjithashtu shënoi.

Ronaldo iu bashkua gjithashtu rivalit të tij të përhershëm dhe kapitenit të Argjentinës, Lionel Messi, si lojtarët e vetëm që kanë luajtur në gjashtë Kupa Bote.

Tre golat e Messit në fitoren ndaj Algjerisë më pak se 24 orë më parë e bënë atë të barazonte rekordin e Ronaldos për të shënuar në pesë Kupa Bote dhe barazimin si golashënuesi më i mirë i të gjitha kohërave në Kupën e Botës dhe, me Kylian Mbappe, Erling Haaland dhe Harry Kane që shënuan nga dy herë në fitoret për Francën, Norvegjinë dhe Anglinë, të gjithë sytë ishin te një tjetër ikonë globale, numri 7 i Portugalisë në Hjuston.

Megjithatë, Ronaldo duroi një pasdite frustrimi duke udhëhequr vijën e sulmit, pasi Portugalia dominoi posedimin e topit, por nuk arriti të mposhtte mbrojtjen e disiplinuar të Kongos.

Ai kishte vetëm 25 prekje topi, më pak se çdo lojtar titullar i Portugalisë, dhe 10 më pak se Yoane Wissa, i cili luajti në sulm dhe shënoi golin e barazimit për Kongon. Në krahasim, zëvendësuesi i Portugalisë, Rafael Leao, kishte 14 prekje topi pasi hyri në fushë pas 72 minutash.

Ishte prekja e dytë më e pakët e topit nga Ronaldo në 23 paraqitje në Kupën e Botës dhe 17 nga 22 pasimet e tij të tentuara shkuan huq.

Ai pati vështirësi të gjente hapësirë në një mbrojtje të disiplinuar kongoleze dhe pati tre gjuajtje, të gjitha jashtë portës, duke humbur dy raste nga afër për atë që mund të kishte qenë gol i fitores në pjesën e dytë, duke vazhduar formën e dobët që tregoi në ndeshjen e fundit përgatitore të Portugalisë kundër Nigerisë më 10 qershor.

Ronaldo mund të shkruajë ende histori dhe të shënojë në Kupën e Botës të gjashtë nëse arrin të shënojë në njërën nga ndeshjet e mbetura të grupit kundër Uzbekistanit të martën e ardhshme dhe Kolumbisë të shtunën në mbrëmje ose në fazat eliminatore.

Nëse e bën këtë të fundit, do të ishte për herë të parë. Tetë golat e tij në Kupën e Botës kanë ardhur të gjitha në ndeshjet e grupeve. Ai nuk ishte paraqitur nga fillimi ndaj Zvicrës në 1/16 e finales në “Katari 2022”, dhe, çuditërisht, një ndeshje që skuadra e tij e fitoi 6:1.

Ronaldo ka shënuar 143 gola në 229 paraqitje – të dyja rekorde botërore – por golin e fundit në Kupën e Botës të fundit e shënoi nga penalltia, në ndeshjen hapëse kundër Ganës. Ai nuk shënoi asnjë gol në “Euro 2024” dhe tani ka kaluar 10 ndeshje pa shënuar gol në një turne të madh.

Ai ishte 36 vjeç herën e fundit që shënoi nga loja në një turne të madh, kundër Gjermanisë në “Euro 2020”.

Martinez: Nuk ka kuptim ta zëvendësojmë Ronaldon

Trajneri i Portugalisë, Roberto Martinez, nuk e kritikoi Ronaldon në konferencën e tij për shtyp pas ndeshjes. 

“Duhet t’i shfrytëzojmë të gjithë lojtarët në fushë. Sulmuesi kryesor Ronaldo duhet të jetë afër zonës së gjashtë metrave dhe ne duhet t’ia çojmë topin atij”.

I pyetur pse nuk e kishte zëvendësuar Ronaldon pas një performance joefektive, Martinez tha, “Nuk ka kuptim të nxirrni jashtë golashënuesin më të mirë në futbollin botëror në një ndeshje ku keni nevojë për gola”

“Për ne në momente si ky, përvoja e Cristianos në zonë është e rëndësishme. Mënyra se si ai tërheq mbrojtësit është e rëndësishme; mënyra se si ne mund ta përdorim hapësirën është e rëndësishme. Dhe çdo lojtar ka një përgjegjësi në fushë. Dhe qartë, kur kërkon gola, duhet ta kesh Cristianon në fushë"

Boateng: Portugalia është një skuadër më e mirë pa të

Bruno Fernandes, në një situatë mbeti me kokën në duar, pas një veprimi të Ronaldos. Ai mori kritika nga ish-fituesi i Kupës së Botës me Francën, Thierry Henry, “Një gjë është e rëndësishme - skuadra duhet të shënojë, ju nuk keni nevojë të shënoni”.

“Por, meqenëse Ronaldo dëshiron të shënojë, ai i del përpara Fernandesit. Nëse ai shkon në atë zonë gjashtë metërisht, mbrojtësi do të duhej ta ndiqte dhe atëherë do të kishte qenë një mundësi për Fernandesin”, tha Henry për “Fox Sports”.

Ish-mesfushori i Ganës, Kevin Prince Boateng, për “SBS Sport në Australi” tha se Portugalia është skuadër më e mirë pa Ronaldon në fushë.

“A mund të jem i sinqertë? Ronaldo, nëse do të ishte një lojtar i vërtetë ekipi, do të tërhiqej dhe do t’i linte lojtarët e rinj të ecnin përpara. Sepse Portugalia është një skuadër më e mirë pa të”, tha Boateng.

“Nëse Portugalia dëshiron të ketë një shans për të shkuar larg, besoj se Ronaldo duhet të tërhiqet, t’i lërë të tjerët të luajnë dhe të hyjë në fushë për 15-20 minutat e fundit”