Zelensky e quan “kompromis të mirë” thirrjen e Trumpit për të ngrirë vijat aktuale të frontit

Presidenti i Ukrainës, Volodymyr Zelensky, ka thënë të mërkurën se thirrja e presidentit amerikan Donald Trump që Ukraina dhe Rusia të ndalen në vijat aktuale të frontit është "një kompromis i mirë", raporton Reuters.

Por Zelensky, i cili po viziton vendet nordike, ka shtuar se dyshonte se presidenti rus, Vladimir Putin, do ta mbështeste atë. 

“(Trumpi) propozoi të qëndrojmë aty ku qëndrojmë dhe të fillojmë bisedën. Mendoj se ky ishte një kompromis i mirë, por nuk jam i sigurt se Putini do ta mbështesë atë, dhe ia thashë presidentit (të SHBA-së”, ka cituar Agence France Press të ketë thënë Zelensky.

Deklarata e Zelenskyt vjen ndërsa planet për të mbajtur një samit midis Trumpit dhe Putinit në Budapest janë pezulluar pasi u raportua se Ukraina dhe aleatët e saj evropianë ishin bashkuar në nxitjen për një armëpushim pa lëshime territoriale nga Kievi.

Megjithatë, Rusia ka thënë të mërkurën se përgatitja për një samit presidencial midis Putinit dhe Trumpit po vazhdonte ende.