Vance paralajmëron se SHBA-ja “do të tërhiqet” nëse Rusia e Ukraina nuk i pranojnë propozimet

Zëvendëspresidenti amerikan, JD Vance, ka thënë të mërkurën se Shtetet e Bashkuara të Amerikës do të “largohen” nga përpjekjet diplomatike për t’i dhënë fund luftës, nëse Ukraina dhe Rusia nuk pajtohen për një marrëveshje, duke riafirmuar komentet e mëparshme të zyrtarëve amerikanë, raporton BBC.

Paralajmërimi i tij është bërë në kohën kur takimi i nivelit të lartë që u prit të mbahej në Londër midis ministrave të Punëve të Jashtme të Britanisë së Madhe, Francës, Gjermanisë, Ukrainës e SHBA-së degradoi në takim të nivelit të zyrtarëve, pasi sekretari amerikan, Marco Rubio, dhe i dërguari i posaçëm, Steve Witkoff refuzuan të marrin pjesë.

SHBA-ja është e përqendruar në bisedimet e kësaj jave në Moskë, ku Witkoff do të takohet për herë të katërt me presidentin rus, Vladimir Putin, teksa shpejtësia e përpjekjeve diplomatike për t’i dhënë fund luftës është shtuar.

Nga ana tjetër, presidenti ukrainas, Volodymyr Zelensky, ka këmbëngulur se duhet “një armëpushim i menjëhershëm, i plotë dhe i pakushtëzuar”.