Presidenti i Shteteve të Bashkuara të Amerikës, Donald Trump, ka deklaruar se nga e marta do të vendosen tarifa ndaj Meksikës dhe Kanadasë, si dhe do të dyfishohet tarifa universale prej 10 për qind ndaj importeve prej Kinës, raporton agjencia e lajmeve “AP”.
Në një postim në rrjetin e tij social “Truth Social” të enjten, Trumpi ka thënë se narkotikët si fentanyli janë duke u kontrabanduar për në SHBA në “nivele të papranueshme” dhe se taksat në import do të detyronin vendet e tjera të luftojnë kontrabandimin.
“Nuk mund të lejojmë të vazhdojë të dëmtojë SHBA-në, dhe si pasojë, deri sa të ndalohet, apo të limitohet seriozisht, tarifat e propozuara të shtyra deri më 4 mars, gjithsesi, që do të hyjnë në efekt, siç janë planifikuar. Kina do të duhet të paguajë 10% tarifë shtesë nga ajo datë”, ka shkruar Trumpi.
Rreziku nga përshkallëzimi i tarifave e ka vënë ekonominë globale në pasiguri – me konsumatorët kanë shprehur frikë rreth përkeqësimit të inflacionit dhe sektori i veturave pritet të marrë goditjen më të madhe nëse vendosen tarifa ndaj dy partnerëve më të mëdhenj ekonomikë të SHBA-së.
Potenciali i rritjes së çmimeve dhe rritjes së vogël ekonomike mund ta godasë politikisht Trumpin, i cili u ka premtuar votueseve vitin e kaluar në zgjedhjet presidenciale se ai do të ulte inflacionin shpejt, i cili ishte rritur shumë gjatë mandatit të presidentit, Joe Biden. Por Trumpi ka premtuar edhe vendosjen e tarifave, të cilat planifikon t’i vendosë me 2 prill, duke rishikuar tarifat për t’i përshtatur me tarifat që vendet e tjera ua vendosin produkteve amerikane.
“Data e Tarifës së Dytë Reciproke të prillit do të mbetet në fuqi me efekt të plotë”, ka shtuar Trumpi në postimin e tij në median sociale.
Trumpi ka dhënë shenja se vendet evropiane do të përballen me tarifa 25%. Po ashtu ai dëshiron të vendosë tarifa të veçanta ndaj veturave, çipave të kompjuterëve dhe barnave që do të taksoheshin si shtesë e tarifave reciproke.
Edhe
Hyjnë në fuqi tarifat e SHBA-së ndaj Meksikës, Kanadasë dhe Kinës
Presidenti veçse ka njoftuar se ai është duke larguar zbutjet në tarifat ndaj aluminit dhe çelikut. Kjo mund të çojë në konflikt tregtar që mund të shtyjë vendet e tjera të vendosin taksat ndaj importeve të SHBA-së në vendet e tyre si formë hakmarrjeje. Kjo veçse është duke ndikuar në konsumatorët nga SHBA-ja, duke minuar potencialisht premtimin e Trumpit për rritje ekonomike.
Tashmë ka rënë besimi i konsumatorëve. Sipas shifrave zyrtare, kjo rënie ishte rënia më e madhe që ka ndodhur brenda muajit që nga gushti i 2021-tës, që ishte gjatë kohës kur ekonomia po ringritej pas pandemisë së koronavirusit. Pritshmëritë për inflacionin mesatar 12-mujor janë rritur nga 5.2% në 6% gjatë shkurtit.
Trumpi kishte vendosur për tarifa ndaj Meksikës dhe Kanadasë e shtim të asaj ndaj Kinës më herët, por e pati shtyrë për 30 ditë.
