-
Përktheu:
Flutura Gashi-Mehmeti
- 3 nëntor 2025 10:19
- Shpërndaje në:
Presidenti amerikan, Donald Trump, ka deklaruar se presidenti kinez, Xi Jinping, e ka siguruar atë se Pekini nuk do të ndërmarrë asnjë veprim drejt qëllimit të tij të deklaruar prej kohësh për bashkimin e Tajvanit me Kinën kontinentale, derisa ai të jetë në krye të SHBA-së.
Trumpi ka thënë se çështja e diskutueshme prej kohësh e Tajvanit nuk është ngritur në bisedimet e tij me Xi-në të enjten në Korenë e Jugut, të cilat u përqendruan kryesisht në tensionet tregtare SHBA-Kinë.
Por udhëheqësi i SHBA-së ka shprehur siguri se Kina nuk do të ndërmarrë veprime ndaj Tajvanit, ndërsa ai është në detyrë.
"Ai e ka thënë hapur, dhe njerëzit e tij e kanë thënë hapur në takime, 'Ne nuk do të bëjmë kurrë asgjë ndërsa Trumpi është president', sepse ata i dinë pasojat", ka deklaruar Trump në një fragment të një interviste për CBS të dielën.
Zyrtarët amerikanë kanë qenë prej kohësh të shqetësuar për mundësinë e përdorimit të forcës ushtarake nga Kina kundër Tajvanit, demokracisë ishullore të vetëqeverisur, të pretenduar nga Pekini si pjesë e territorit të saj.
Akti i Marrëdhënieve me Tajvanin i vitit 1979, i cili ka rregulluar marrëdhëniet e SHBA-së me ishullin, nuk kërkon që SHBA-ja të ndërhyjë ushtarakisht nëse Kina pushton, por e bën politikë amerikane të sigurojë që Tajvani të ketë burimet për të mbrojtur veten dhe për të parandaluar çdo ndryshim të njëanshëm të statusit nga Pekini.
I pyetur nëse do t'i urdhëronte forcat amerikane të mbronin Tajvanin nëse Kina sulmonte, Trump ngurroi të jepte përgjigje.
Shtetet e Bashkuara, si administrata republikane ashtu edhe ajo demokratike, kanë mbajtur një politikë "paqartësie strategjike" ndaj Tajvanit, duke u përpjekur të mos japin mendimin e tyre nëse SHBA-ja do t'i vinte në ndihmë ishullit në një skenar të tillë.