Trump: Marina amerikane do të shoqërojë cisternat e Hormuzit nëse është e nevojshme

Presidenti amerikan, Donald Trump, ka deklaruar se "nëse është e nevojshme, Marina e Shteteve të Bashkuara do të fillojë shoqërimin e cisternave përmes Ngushticës së Hormuzit, sa më shpejt të jetë e mundur".

Lufta SHBA-Izrael me Iranin ka ndaluar pothuajse tërësisht trafikun detar që kalon përmes Ngushticës së Hormuzit, midis Gjirit Persik dhe Gjirit të Omanit.

Është një nga rrugët më të rëndësishme në botë për furnizimet globale me naftë dhe gaz, me pothuajse 20 milionë fuçi naftë që kalojnë në ditë.

Trumpi ka thënë po ashtu se ai ka udhëzuar një agjenci federale të ofrojë "sigurim kundër rrezikut politik dhe garanci për të gjithë tregtinë detare" përmes Gjirit.

"Pavarësisht gjithçkaje, Shtetet e Bashkuara do të sigurojnë rrjedhën e lirë të energjisë në botë”, ka thënë Trumpi.

Një zyrtar iranian ka deklaruar të hënën se Irani do t'i "vërë flakën kujtdo që përpiqet të kalojë" nëpër Ngushticën e Hormuzit, ngushticë nëpër të cilën kalon një e pesta e naftit dhe gazit në botë.

Paralajmërimi ka ardhur nga Ebrahim Jabbari, një këshilltar i Komandantit të Përgjithshëm të Korpusit të Gardës Revolucionare Islamike (IRGC) të Iranit, duke folur në televizionin shtetëror.

Ai ka shtuar se ngushtica është e mbyllur dhe ka paralajmëruar anijet se do të përballen me përgjigje serioze nëse vijnë tek kjo ngushticë.

"Ata nuk duhet të vijnë në këtë rajon. Ata me siguri do të përballen me një përgjigje serioze nga ne", ka thënë ai.