Tre të vdekur në Irak nga një sulm turk me dronë

Një sulm me dronë nga Turqia ka lënë të vdekur tre anëtarë të Partisë së Punëtorëve të Kurdistanit (PKK) në Irakun verior të shtunën vonë, ka thënë të dielën shërbimi kundër terrorizmit i Kurdistanit të Irakut.

Sulmi turk shënjestroi një automjet në një zonë malore pranë provincës veriore të Irakut Dohuk, duke vrarë tre, përfshirë një person të identifikuar si një "zyrtar i lartë i PKK", thuhet në një deklaratë, raporton Reuters.

Turqia kryen rregullisht sulme ajrore ndaj militantëve të PKK-së në Irakun verior dhe ka dhjetëra poste në territorin irakian.

PKK nisi një kryengritje kundër Ankarasë në vitin 1984 me qëllimin fillestar të krijimit të një shteti të pavarur kurd. 

Më pas, ajo moderoi qëllimet e saj për të kërkuar të drejta më të mëdha kurde dhe autonomi të kufizuar në Turqinë juglindore.