Të paktën shtatë persona kanë vdekur pasi një urë u shemb mbi shinat hekurudhore në Rusi pranë kufirit me Ukrainën, sipas shërbimeve të emergjencës.
Disa kamionë të rëndë u rrëzuan mbi një tren pasagjerësh i cili ishte në lëvizje, duke lënë gjithashtu 31 persona të plagosur, shkruan BBC.
Ministria Ruse e Emergjencave tha se njësitë e zjarrfikësve dhe shpëtimit po përpiqeshin të gjenin njerëzit që kishin udhëtuar në tren.
Në një deklaratë të postuar në Telegram, Hekurudha e Moskës pretendoi se ura ishte shembur “si rezultat i ndërhyrjes së paligjshme në operacionet e transportit”.
Të dielën në mëngjes, një urë tjetër u shemb përgjatë autostradës Trosna-Kalinovka në rajonin e Kurskut, sipas guvernatorit në detyrë Alexander Khinshtein.
Një tren mallrash po udhëtonte mbi urë në atë kohë, tha ai, duke shtuar se një pjesë e trenit kishte rënë poshtë në rrugë.
Treni u përfshi nga flakët, tha Khinshtein, dhe një shofer pësoi lëndime në këmbë.
Fotografitë në internet nga incidenti i parë në Bryansk treguan vagona të dëmtuar dhe pasagjerë që ndihmonin njëri-tjetrin të dilnin nga rrënojat.
