Takimi Trump-Putin është një “ushtrim dëgjimi” për presidentin, thotë Shtëpia e Bardhë

Sekretarja për Shtyp e Shtëpisë së Bardhë, Karoline Leavitt, ka thënë të martën se takimi i Donald Trumpit me liderin rus, Vladimir Putin, do të jetë një ushtrim dëgjimi për presidentin amerikan. 

Sipas saj, Trumpi e sheh kështu takimin, sepse vetëm një palë do të jetë e pranishme. 

Në një konferencë për media, Leavitt u është përgjigjur gjithashtu pyetjes se pse Zelensky nuk u përfshi në takimin e së premtes, pavarësisht thirrjeve nga udhëheqësit evropianë.

Ajo ka nënvizuar se Putini bëri thirrje për këtë takim dhe "qëllimi i këtij takimi për presidentin është të largohet me një mirëkuptim më të madh se si mund të përfundohet kjo luftë”.  

Leavitt gjithashtu ka riafirmuar shpresat e Trumpit për një takim trepalësh në të ardhmen.

Samiti Trump-Putin do të mbahet më 15 gusht në Alaska.