Starmer niset drejt Kinës teksa aleancat perëndimore përballen me tendosje

Kryeministri britanik, Keir Starmer, pritet të mbërrijë në Pekin të mërkurën në mbrëmje për një vizitë që synon forcimin e lidhjeve politike dhe të biznesit me Kinën.

Vizita vjen në një kohë kur marrëdhëniet mes vendeve perëndimore dhe Shteteve të Bashkuara po bëhen gjithnjë e më të paqëndrueshme.

Gjatë udhëtimit drejt Kinës për vizitën e parë të një lideri britanik që nga viti 2018, Starmer ka thënë se Britania nuk mund të përballojë të injorojë mundësitë ekonomike që ofron Kina, ekonomia e dytë më e madhe në botë, ndërkohë që duhet të mbetet vigjilente ndaj kërcënimeve të mundshme të sigurisë.

“Nuk ka kuptim të fusim kokën në tokë dhe ta varrosim në rërë kur bëhet fjalë për Kinën, është në interesin tonë të angazhohemi”, ka thënë ai. 

“Do të jetë një udhëtim vërtet i rëndësishëm për ne dhe do të bëjmë përparim të vërtetë”, ka shtuar Starmer.

Duke udhëtuar me një delegacion prej më shumë se 50 drejtues biznesi, Starmer do të takohet të enjten me presidentin Xi Jinping dhe kryeministrin Li Qiang, përpara se të udhëtojë të premten drejt Shangait për bisedime me drejtues lokalë.

Vizita mund të shënojë një ndryshim kritik në marrëdhëniet mes Britanisë dhe Kinës pas vitesh përplasjesh të thella për shkak të goditjes së Pekinit ndaj lirive politike në Hong Kong, mbështetjes së Kinës për Rusinë në luftën në Ukrainë dhe akuzave nga shërbimet britanike të sigurisë se Kina spiunon rregullisht politikanë dhe zyrtarë.

Ndërkaq për Kinën, kjo vizitë ofron një mundësi për ta paraqitur veten si një partner të qëndrueshëm dhe të besueshëm në një kohë çrregullimi global.