Kryeministri i Spanjës, Mariano Rajoy, u shfaq në televizionin kombëtar për t’iu bërë thirrje separatistëve të Katalonjës të braktisin planet për referendumin për pavarësi më 1 tetor.
Ai kërkoi nga qeveria e rajonit të heqë dorë nga “përshkallëzimi i radikalizmit dhe mosbindjes”.
Autoritetet spanjolle kanë bërë përpjekje të ndalin votimin, të cilin e konsiderojnë si të paligjshëm, duke konfiskuar materialet e votimit.
Kërkimet e policisë në Barcelonë, kryeqytetin e Katalonjës, kanë shkaktuar protesta masive në rrugë, të mërkurën.
Rreth 40,000 njerëz kanë bllokuar hyrjen në Ministrinë e Ekonomisë së Katalonjës, mbrëmë vonë.
Partitë separatiste që kontrollojnë Parlamentin e Katalonjës, kanë miratuar ligjin për referendum në fillim të këtij muaji, pasi me vite kanë kërkuar të drejtën për të mbajtur votim të lirë për vetëvendosje.
Edhe
Rajoy do që në Katalonjë të mos votohet për separatistët
Duke folur nga rezidenca e tij zyrtare, Rajoy tha se “ka ende kohë për t’i shmangur të këqijat më të mëdha”, ndërsa u bëri thirrje liderëve katalanas të respektojnë ligjin.
Katalonja, një rajon i pasur me 7.5 milionë banorë në verilindje të Spanjës, ka gjuhën dhe kulturën e saj, por nuk njihet si komb i veçantë nga shteti spanjoll.
