Shteti që planifikon ta ketë ushtrinë më të fortë në Evropë në dy vjet

Ministri polak i Mbrojtjes, Mariusz Blaszczak, ka thënë se vendi i tij planifikon të ketë ushtrinë më të fortë në Evropë në dy vjet dhe shpjegoi se si do ta arrijë këtë, shkruan Mirror.

Nxitur nga kërcënimi i agresionit rus, qeveria polake filloi një investim të madh të mbrojtjes prej shumë miliardë eurosh, që rezultoi në porosi masive për tanke, artileri dhe avionë luftarakë.

Qeveria, e cila përballet me zgjedhje të përgjithshme në vjeshtë, synon gjithashtu të dyfishojë numrin e ushtrisë polake në 300 mijë anëtarë të përhershëm, si pjesë e një politike ambicioze të mbrojtjes që mund ta kthejë Poloninë në fuqinë kryesore ushtarake të kontinentit.

“Ne po kërkojmë një mandat tjetër, sepse atëherë mund të përfundojmë procesin që kemi filluar. Na duhen edhe dy vjet dhe më pas ushtria polake do të jetë më e forta në Evropë. Ne jemi në rrugën e duhur për ta bërë këtë”, ka thënë ai për radion publike të Polonisë.

Kryeministri polak Mateusz Morawiecki po viziton Shtetet e Bashkuara dhe Varshava pritet të propozojë një “partneritet strategjik” me Uashingtonin që do të theksojë marrëdhëniet e forta midis dy vendeve.