Mbështete KOHËN. Ruaje të vërtetën
Botë

Huthët forcojnë kontrollin mbi Ngushticën Bab el-Mandeb pas tërheqjes së forcave jemenase

houthet

Forcat jemenase proqeveritare, të mbështetura nga Arabia Saudite, kanë njoftuar se po tërhiqen nga një zonë që mbikëqyr Ngushticën Bab el-Mandeb, me rëndësi strategjike, duke ia lënë atë nën kontroll lëvizjes Huthi, e cila mbështetet nga Irani.

Ushtria e Jemenit tha se po zhvendoste trupat nga kjo pikë kyçe e transportit detar, në skajin jugor të Detit të Kuq, për të mbrojtur Adenin, kryeqytetin e përkohshëm të vendit.

Ky ndryshim i jep fund një ofensive disa javore, e cila synonte sigurimin e zonës pranë kësaj rruge ujore, pasi Huthët e morën atë në një ofensivë të befasishme në muajin shtator. Kjo situatë ka kufizuar eksportet globale të naftës dhe ka detyruar mijëra njerëz të largohen nga shtëpitë e tyre.

Mediat e kontrolluara nga Huthët raportuan më vonë, të dielën, se grupi kishte marrë kontrollin e këtij territori. Arabia Saudite nuk ka dhënë ende ndonjë koment.

Forcat proqeveritare thanë se e kishin “siguruar” ngushticën në fillim të muajit tetor, ndërsa po përpiqeshin të rimerrnin territore të rëndësishme nga Huthët. Këta të fundit kishin deklaruar se një muaj më parë kishin pushtuar disa zona, përfshirë ishullin Perim, në hyrje të ngushticës, si dhe qytetin port strategjik të Mokhës.