-
Përktheu:
Flutura Gashi-Mehmeti
- 28 shtator 2026 10:59
- Shpërndaje në:
Kina dhe Shtetet e Bashkuara kanë rënë dakord të ulin tarifat e vendosura ndaj mallrave me vlerë 60 miliardë dollarë të importuara nga njëra-tjetra, për një sërë produktesh, nga misri amerikan te kozmetika, si dhe nga pajisjet elektroshtëpiake kineze te lodrat.
Në kuadër të Bordit të Tregtisë SHBA-Kinë, të dyja vendet kanë propozuar secila 30 miliardë dollarë tregti me mallra jo të ndjeshme, për të përfituar nga trajtimi më i favorshëm tarifor, ka thënë përfaqësuesi i Tregtisë së SHBA-së, Jamieson Greer, në një deklaratë të dielën.
Për Shtetet e Bashkuara, kjo nënkupton “mundësimin e qasjes së përmirësuar në treg” për rreth 30% të eksporteve amerikane drejt Kinës, ka thënë ai.
Ulja reciproke e tarifave, si dhe zgjatja e një armëpushimi tregtar, ishin ndër përfundimet kryesore nga samiti i dytë këtë vit mes presidentit kinez Xi Jinping dhe presidentit amerikan Donald Trump, i zhvilluar në Ëashington javën e kaluar.
Njëra nga dy listat e Shtëpisë së Bardhë tregonte se Kina planifikonte të ulte tarifat për një sërë produktesh bujqësore amerikane, përfshirë misrin, grurin, melekun, mishin, produktet e qumështit, vajrat bimore dhe ushqimet për kafshë. Soja nuk ishte përfshirë në listë.
Pekini zyrtar do të shqyrtojë gjithashtu uljen e tarifave për peshkun dhe prodhimet e detit nga SHBA-ja, trungjet dhe produktet e drurit, kozmetikën dhe pajisjet mjekësore.
Në një listë tjetër ishin uljet reciproke të tarifave nga Ëashingtoni për pajisjet e vogla elektroshtëpiake kineze, si aparatet e kafesë dhe tosterët, si dhe për enët e tavolinës, batanijet dhe çarçafët.
Listat përfshinin gjithashtu lodra, fishekzjarre, lule artificiale, drita për pemët e Krishtlindjeve dhe dekorime të tjera festive, si dhe sedilje makinash për fëmijë.
Ministria kineze e Tregtisë ka thënë të hënën se zgjatja me dy muaj e armëpushimit tregtar me Shtetet e Bashkuara, deri më 10 janar, do t’u krijonte të dyja palëve hapësirë për të vlerësuar marrëveshjen aktuale për zgjidhjen e çështjeve ekonomike dhe tregtare, duke shqyrtuar njëkohësisht mënyrat për të avancuar në këto fusha.
Zgjatja gjithashtu siguron një “mjedis politik relativisht të qëndrueshëm dhe të parashikueshëm” për bashkëpunimin mes kompanive dhe vazhdimin e diskutimeve aktive.
Të dyja palët do të zhvillojnë bisedime të rregullta për mundësitë dhe pengesat e mundshme të investimeve, duke rritur transparencën dhe parashikueshmërinë e politikave dhe duke iu përgjigjur shqetësimeve të kompanive, ka thënë ministria.