-
Përktheu:
Flutura Gashi-Mehmeti
- 26 tetor 2025 12:09
- Shpërndaje në:
Rusia ka testuar me sukses raketën e saj me energji bërthamore Burevestnik, për të cilën Moska thotë se mund të depërtojë në çdo mburojë mbrojtëse.
Testi, së bashku me një stërvitje bërthamore javën e kaluar, dërgon një mesazh se Rusia, sipas fjalëve të presidentit rus, Vladimir Putin, nuk do t'i nënshtrohet kurrë presionit nga Perëndimi për shkak të luftës në Ukrainë, ndërsa presidenti i SHBA-së, Donald Trump, mban një qëndrim më të ashpër kundër Rusisë për të nxitur një armëpushim.
Gjenerali i lartë i Rusisë, Valery Gerasimov, shefi i shtabit të përgjithshëm të forcave të armatosura të Rusisë, i ka thënë Putinit se raketa udhëtoi 14,000 km dhe qëndroi në ajër për rreth 15 orë kur u testua më 21 tetor.
Rusia thotë se raketa 9M730 Burevestnik (Storm Petrel) - e quajtur SSC-X-9 Skyfall nga NATO-ja, është "e pamposhtur" ndaj mbrojtjeve raketore aktuale dhe të ardhshme, me një rreze veprimi pothuajse të pakufizuar dhe një rrugë fluturimi të paparashikueshme.
“Është një armë unike që askush tjetër në botë nuk e ka”, ka thënë Putini, në një takim me gjeneralët që mbikëqyrin luftën në Ukrainë, në komentet e publikuara nga Kremlini të dielën.
Që nga viti 2018, Putini e ka cilësuar armën si një përgjigje ndaj lëvizjeve të Shteteve të Bashkuara për të ndërtuar një mburojë mbrojtëse nga raketat, pasi Uashingtoni në vitin 2001 u tërhoq në mënyrë të njëanshme nga Traktati i Raketave Anti-Balistike i vitit 1972, dhe për të zgjeruar aleancën ushtarake të NATO-s.