Rivali kryesor i Erdoganit dënohet me një vit e tetë muaj burgim

Një gjykatë turke ka vendosur të mërkurën që ta dënojë kryebashkiakun e Stambollit, Ekrem Imamoglun, njëkohësisht rivalin kryesor politik të presidentit turk, Recep Tayyip Erdogan, me një vit e tetë muaj burgim për fyerje dhe kërcënim ndaj një zyrtari publik, ka shkruar Reuters.

Mirëpo, dënimi me burgim duhet të konfirmohet edhe nga dy Gjykata të Apelit.

E kjo është hera e dytë që Imamoglu dënohet për fyerje të zyrtarëve publikë. Në vitin 2022, ai ishte dënuar me dy vjet e gjashtë muaj burgim për kritikimin e zyrtarëve të bordit zgjedhor lidhur me një vendim për anulimin e zgjedhjeve të Stambollit të vitit 2019, në të cilat ai e mposhti kandidatin e Partisë AKP në pushtet.

Ai e ka apeluar këtë dënim, porse ende nuk është shqyrtuar.

Imamoglu i mohon akuzat.

“Kam luftuar kundër abuzimit të gjyqësorit dhe kundër përdorimit të tij si mjet politik. Kjo është me të vërtetë një fyerje kundër kombit tonë”, u citua të ketë thënë Imamoglu nga transmetuesi Halk TV dhe media të tjera turke.

Dënimi i vitit 2022, nëse mbështetet, mund ta pengojë Imamoglun të marrë pjesë në zgjedhjet e ardhshme. Në muajin mars, Universiteti i Stambollit e kishte anuluar diplomën universitare të Imamoglut, pa të cilën ai nuk mund të kandidojë për president.

Që nga tetori i vitit të kaluar, autoritetet policore kanë ndaluar më shumë se 500 persona, mbi 200 prej të cilëve u burgosën në pritje të gjyqit, nën hetime ndaj bashkive të drejtuara nga partia kryesore opozitare CHP.

CHP-ja i ka mohuar akuzat për korrupsion dhe i quan ato një përpjekje të politizuar nga qeveria për të hequr kërcënimet zgjedhore kundër Erdoganit, një akuzë që qeveria e hedh poshtë.