Putini pritet ta aneksojë të premten Ukrainën juglindore

Aneksimi i rajoneve, i cili mund të ndodhë që të premten, krijon terrenin për një fazë të re të rrezikshme në luftën shtatëmujore në Ukrainë. Rusia paralajmëroi se mund të përdorë vendosjen e armëve bërthamore për të mbrojtur territorin e saj, duke përfshirë tokat e fituara rishtazi

Referendumet e orkestruara nga Kremlini, që pritet të shërbejnë si pretekst për Moskën për të aneksuar rajonet e Ukrainës të kontrolluara nga Rusia, përfunduan të martën pasi rezultati i paracaktuar i votave rriti tensionin midis Rusisë dhe Perëndimit.

Zyrtarët e mbështetur nga Moska në katër rajonet e pushtuara në Ukrainën jugore dhe lindore thanë se qendrat e votimit u mbyllën të martën pasdite pas pesë ditësh votimi dhe numërimi i votave kishte filluar.

Aneksimi i rajoneve, i cili mund të ndodhë që të premten, krijon terrenin për një fazë të re të rrezikshme në luftën shtatëmujore në Ukrainë. Rusia paralajmëroi se mund të përdorë vendosjen e armëve bërthamore për të mbrojtur territorin e saj, duke përfshirë tokat e fituara rishtazi.

Ndryshim radikal

Pas pesë ditëve të votimit "situata do të ndryshojë rrënjësisht nga pikëpamja juridike, nga pikëpamja e së drejtës ndërkombëtare, me të gjitha pasojat përkatëse për mbrojtjen e atyre zonave dhe garantimin e sigurisë së tyre", tha të martën zëdhënësi i Kremlinit, Dmitry Peskov.

Presidenti rus, Vladimir Putin, ka folur për opsionin bërthamor të Moskës që nga java e kaluar pas një kundërofensive ukrainase që çoi në pengesat e fundit në fushën e betejës.

Votimi që filloi të premten në rajonet Kherson, Zaporizhzhia, Luhansk dhe Donetsk dhe thirrja e rezervistëve ushtarakë rusë të urdhëruar nga Putini janë strategji të tjera që synojnë të mbështesin pozicionin e ekspozuar të Moskës.

Dmitry Medvedev, nënkryetar i Këshillit të Sigurimit rus të kryesuar nga Putini, e shprehu kërcënimin në termat më të prerë deri më tani të martën.

“Le të imagjinojmë se Rusia është e detyruar të përdorë armën më të fuqishme kundër regjimit ukrainas që ka kryer një akt agresioni në shkallë të gjerë, i cili është i rrezikshëm për vetë ekzistencën e shtetit tonë”, shkroi Medvedev në kanalin e tij të aplikacionit të mesazheve. "Unë besoj se NATO-ja do të shmanget nga ndërhyrja e drejtpërdrejtë në konflikt në atë rast”.

Paralajmërimi amerikan

Shtetet e Bashkuara i kanë hedhur poshtë bisedimet bërthamore të Kremlinit si taktika frikësuese.

Jake Sullivan, këshilltar i sigurisë kombëtare i SHBA-së, iu përgjigj kërcënimeve bërthamore të Putinit nga java e kaluar. Sullivan i tha NBC-së se Rusia do të paguante një çmim të lartë, nëse Moska do t'i zbatonte kërcënimet për të përdorur armë bërthamore në luftën në Ukrainë.

Referendumet pyesin banorët nëse duan që zonat të bëhen pjesë e Rusisë. Por, votimi ka qenë çdo gjë tjetër veçse i lirë apo i drejtë.

Dhjetëra mijëra banorë ishin larguar tashmë nga rajonet në mes të luftës dhe imazhet e shpërndara nga ata që mbetën tregonin trupat e armatosura ruse që shkonin derë më derë për të bërë presion ndaj ukrainasve për të votuar.

Kryetari i Mariupolit, Vadym Boychenko, i cili u largua nga qyteti port pasi rusët më në fund e pushtuan pas një rrethimi prej muajsh, tha se vetëm rreth 20% e 100.000 banorëve të mbetur të vlerësuar votuan në referendumin e Donjeckut. Mariupoli kishte një popullsi të paraluftës prej 541.000 banorësh.

Votimi nën tytat e armëve

"Një burrë që merr një pushkë sulmi vjen në shtëpinë tuaj dhe ju kërkon të votoni, kështu që çfarë mund të bëjnë njerëzit?" – pyeti Boychenko gjatë një konference për shtyp, duke shpjeguar se si njerëzit u detyruan të votonin.

Aleatët perëndimorë qëndruan në anën e Ukrainës, duke i hedhur poshtë votat e referendumit si një mashtrim.

Ministrja e Jashtme franceze, Catherine Colonna, tha gjatë vizitës në Kiev të martën se Franca ishte e vendosur "të mbështesë Ukrainën dhe sovranitetin e integritetin e saj territorial".

Ajo i përshkroi fletët e votimit si “referendume tallëse”. Zyrtarët ukrainas thanë se Parisi dhe Kievi ishin afruar më pranë një marrëveshjeje që do të bënte forcat ukrainase me sistemet franceze të artilerisë Cezar.

Ndërkohë mobilizim masiv ushtarak i rusëve ka rezultuar në njëfarë mase kundër Putinit.

Ai ka shkaktuar një eksod masiv burrash nga vendi, ka nxitur protesta në shumë rajone anembanë Rusisë dhe ka shkaktuar akte të rastësishme dhune. Të hënën një person i armatosur hapi zjarr në një zyrë rekrutimi në një qytet siberian dhe plagosi rëndë shefin lokal të rekrutimit ushtarak. Të shtënat erdhën pas zjarrvënieve të shpërndara në zyrat e regjistrimit.

Me Putinin mbështetur me shpatulla për muri pas sukseseve të fundit të Ukrainës në fushën e betejës, media ruse spekuloi se ai mund të zbatojë urdhrin e pjesshëm të mobilizimit të javës së kaluar duke shpallur ligjin ushtarak dhe duke mbyllur kufijtë e vendit për të gjithë burrat në moshë luftarake.

Keqtrajtimet sistematike

Zyrtarët rusë njoftuan planet për të ngritur një zyrë rekrutimi ushtarak pikërisht në kufirin me Gjeorgjinë, një nga rrugët kryesore të eksodit.

Ndërsa Moska punon për të vendosur trupat e saja në Ukrainë, granatimet ruse vazhduan të marrin jetë. Të paktën 11 civilë u vranë dhe 18 të tjerë u plagosën nga breshëritë ruse në 24 orë, tha të martën zyra presidenciale e Ukrainës.

Midis viktimave ishin tetë persona, duke përfshirë një djalë 15-vjeçar, të cilët u vranë nga një sulm rus në qytetin Pervomaiskyi në rajonin verilindor të Kharkiv.

Pavlo Kyrylenko, guvernator i rajonit lindor të Donetskut, ku predhat vranë tre persona, tha se "çdo ditë të referendumit numërojmë më shumë të vdekur në Donbas dhe ato shifra trishtuese tregojnë qëllimet reale të Rusisë".

Donjecku dhe Luhansku, që separatistët e mbështetur nga Moska i kanë kontrolluar pjesërisht për tetë vjet, së bashku përbëjnë rajonin industrial të Donbasit të Ukrainës.

Një mision monitorues i ngritur nga Zyra e OKB-së për të drejtat e njeriut publikoi të martën vështrimin e parë gjithëpërfshirës për shkeljet e të drejtave dhe abuzimet e kryera nga Rusia dhe Ukraina midis 1 shkurtit dhe 31 korrikut, një periudhë që mbulon pesë muajt e parë të pushtimit rus.

Matilda Bogner, shefe e misionit, tha se të burgosurit ukrainas të luftës duket se janë përballur me keqtrajtim "sistematik", "jo vetëm pas kapjes së tyre, por edhe pas transferimit të tyre në vendet e internimit" në zonat e kontrolluara nga Rusia të Ukrainës dhe vetë Rusisë.