Përleshje mes pilotëve në fluturimin Dubai-Izrael, avioni devijon drejt Arabisë Saudite

Një avion që udhëtonte drejt Izraelit nga Emiratet e Bashkuara Arabe, ka devijuar drejt Arabisë Saudite pasi transmetoi sinjale emergjence, pas një përleshjeje mes pilotëve, ka thënë të mërkurën një zyrtar izraelit.

Fluturimi FZ1073 i kompanisë Flydubai, nga Dubai drejt Tel Avivit, ka devijuar mbi hapësirën ajrore të Jordanisë drejt Arabisë Saudite, duke transmetuar një sinjal të përgjithshëm emergjence dhe më pas, disa minuta më vonë, një tjetër sinjal emergjence që tregonte ndërhyrje të mundshme të paligjshme, sipas faqes së gjurmimit të fluturimeve Flightradar24

Avioni Boeing 737, në të cilin sipas mediave izraelite ndodheshin rreth 150 pasagjerë izraelitë, më pas transmetoi sërish sinjalin fillestar të përgjithshëm të emergjencës, përpara se të ulej më vonë në aeroportin Tabuk, në veriperëndim të Arabisë Saudite, ka thënë faqja.

Të dhënat e avionit tregonin se ai kishte zbritur papritur për më shumë se 4000 metra në më pak se 30 sekonda, përpara transmetimit të sinjalit të parë të emergjencës, ka thënë Flightradar24.

Sinjalet e emergjencës shkaktuan një reagim të madh të sigurisë në Izrael, i cili nuk ka marrëdhënie diplomatike zyrtare me Arabinë Saudite, ku avioni u ul. 

Edhe Botë 7 mar 2026 Momenti kur droni godet ngjitur me Aeroportin e Dubait

Incidenti ka nxjerrë në pah rreziqet e mundshme në një itinerar që është bërë i njohur mes shtetasve izraelitë që kur Emiratet e Bashkuara Arabe dhe Izraeli normalizuan marrëdhëniet gjashtë vjet më parë.

Doron Spielman, zëdhënës i zyrës së kryeministrit izraelit, i ka thënë Reuters se nuk besohej se incidenti kishte qenë një rrëmbim avioni, duke e përshkruar atë si një “incident tjetër”.

Një zëdhënës i kompanisë ajrore ka thënë se fluturimi i Flydubai përjetoi një “incident” gjatë rrugës për në Tel Aviv dhe devijoi drejt Tabukut, ku u ul i sigurt. Të gjithë pasagjerët ishin të sigurt dhe u verifikua prania e tyre, ka thënë zëdhënësi, pa dhënë detaje të tjera.

Një zyrtar izraelit, duke folur në kushte anonimiteti, i ka thënë Reuters se pilotët kishin transmetuar sinjalet e emergjencës pasi ishin përfshirë në një përleshje fizike me njëri-tjetrin.

Nuk ishte menjëherë e qartë nëse ndonjëri prej pilotëve i kishte transmetuar qëllimisht sinjalet.

Mediat izraelite kanë publikuar një fotografi që pretendohej se ishte bërë brenda avionit, e cila dukej se tregonte këmishën e një pasagjeri të mbuluar me gjak. 

Në një deklaratë, zyra e kryeministrit izraelit ka thënë se situata ishte “nën kontroll” dhe se po merreshin të gjitha masat për t’i kthyer pasagjerët izraelitë në Izrael.

Flydubai operon fluturime të përditshme vajtje-ardhje mes Dubait dhe Tel Avivit, një itinerar që është i popullarizuar mes shtetasve izraelitë. Rruga e fluturimit zakonisht kalon përmes hapësirës ajrore të Arabisë Saudite dhe Jordanisë.

Edhe Botë 2 mar 2026 Numër i kufizuar fluturimesh rifillon sonte nga Dubai

Nuk është hera e parë që një fluturim mes Izraelit dhe Emirateve të Bashkuara Arabe ulet në Arabinë Saudite. 

Një fluturim i Flydubai nga Dubai drejt Tel Avivit ka bërë një ulje emergjente në Riad në shtator të vitit 2025 për shkak të një incidenti mjekësor, raportuan në atë kohë mediat izraelite.