Parlamenti australian i kërkon falje punëtores e cila thotë se u përdhunua në vend të punës

Kryeministri australian, Scott Morrison i ka kërkuar falje një ish-punonjëses politike e cila thotë se u përdhunua nga kolegu në Dhomën e Parlamentit në vitin 2019.

Pretendimet dhe ankesat e Britttany Higgins për mënyrën se si ajo trajtohej nga shefat nxitën një rishikim në kulturën parlamentare të vendit të punës.

Kërkimi i faljes në parlament të martën ishte edhe për të tjerët që kanë përjetuar sjellje të pahijshme seksuale ose ngacmime.

Morrison është përballur edhe më herët me kritika për përgjigjet e tij.

Higgins ishte ulur në galerinë publike të Dhomës së Përfaqësuesve për të parë kërkimfaljet nga kryeministri, lideri i opozitës dhe të tjerë.

“Më vjen keq, na vjen keq. Më vjen keq zonjës Higgins për gjërat e tmerrshme që ndodhën këtu. Vendi që duhet të ishte një vend sigurie, që doli të ishte një makth”, tha Morrison.