Pak para votimit në OKB, Netanyahu këmbëngul të mos ketë shtet palestinez

Kryeministri izraelit, Benjamin Netanyahu është zotuar të dielën se do të kundërshtojë çdo përpjekje për të krijuar një shtet palestinez, një ditë para se Këshilli i Sigurimit i OKB-së të votojë për rezolutën amerikane që lë derën hapur për pavarësinë palestineze.

Netanyahu e ka përjashtuar prej kohësh pavarësinë palestineze. Por, ndërsa SHBA-ja përpiqet ta çojë përpara planin e saj për armëpushim në Gazë, udhëheqësi izraelit përballet me presion të madh ndërkombëtar për të treguar fleksibilitet.

Këshilli i Sigurimit i OKB-së pritet të votojë të hënën për propozimin e SHBA-së për një mandat të OKB-së për një forcë ndërkombëtare stabilizimi në Gazë.

SHBA-ja, nën presionin ndërkombëtar nga vendet që pritet të kontribuojnë me trupa në forcë, e ka rishikuar rezolutën me një gjuhë më të fortë në lidhje me vetëvendosjen palestineze. Tani thuhet se plani i Trumpit mund të krijojë një "rrugë të besueshme" drejt shtetësisë palestineze. Një propozim rival rus përdor një gjuhë edhe më të fortë në favor të shtetësisë palestineze.

Partnerët qeverisës të linjës së ashpër të Netanyahut e kanë nxitur atë të mbajë një qëndrim të ashpër në lidhje me thirrjet për pavarësinë palestineze. Duke folur para kabinetit të tij, Netanyahu ka thënë të dielën se kundërshtimi i Izraelit ndaj shtetit palestinez "nuk ka ndryshuar aspak".

Netanyahu ka shtuar se ka penguar çdo përparim drejt një shteti palestinez për dekada të tëra dhe nuk kërcënohet nga presioni i jashtëm apo i brendshëm. 

"Nuk kam nevojë për pohime, cicërima apo leksione nga askush", ka thënë ai.

Netanyahu gjithashtu ka vërë në dukje se plani i Trumpit kërkon që Gaza të demilitarizohet dhe Hamasi të çarmatoset. 

"Ose kjo do të ndodhë në mënyrën e lehtë ose do të ndodhë në mënyrën e vështirë", është shprehur ai.