“Mjaft babi, ajo ka vdekur”: Një ditë tjetër e humbjes në Ukrainë

Ajo kishte dalë jashtë të ushqente macet kur bombardimi filloi.

Pasdite, një lagje banimi, koha për të kryer punët. Por, nuk ka asgjë rutinë në jetën pranë vijës së frontit në Ukrainë.

Kharkivi, qyteti i dytë më i madh në vend dhe rrugë e shkurtë nga kufiri rus, jeton me zhurmën e artilerisë dhe bombave shurdhuese që shpërthejnë shumë afër shtëpive.

Natalia Kolesnik, si banorët e tjerë, mësoi të jetonte me rreziqet. Më pas, në një të enjte të nxehtë në një oborr, bombardimet e kapën edhe atë.

Ajo ishte një nga tre trupat e rënë në tokën e ndotur, shkroi Associated Press.

Një trup nuk njihej. I dyti, me një fustan të verdhë të grisur dhe një këpucë blu të hedhur matanë, shtrihet në tokë. Pranë tij, kishte një kuti me fruta gjysmë të ngrënë, qershi dhe molla, të spërkatura me gjak.

Brenda çantës të lënë në stol, cingëronte telefoni.

Kolesnik ishte afër.

Bashkëshorti i saj, Viktori, arriti i tronditur. Ai nuk donte ta lëshonte. Ai ia përkëdheli kokën.

“Babi, kaq mjafton”, tha djali i tij Olexander, duke parë ndihmësit që prisnin ta mbyllnin qesen me trupin në të.

“Ajo ka vdekur. Çohu”.

“A nuk kupton?” pyeti i ati.

“Çfarë nuk kuptoj?” u përgjigj djali. “Kjo është nëna ime. Babi, të lutem. Babi, të lutem”.

Në gjunjë, Viktori përqafoi çfarë kishte mbetur nga gruaja e tij.

Ai ia mori dorën e majtë duke e mbuluar me të tijën.

Lutja vazhdoi.

“Babi, shko”.

“Nuk mund të shkoj”.

“Shiko, je mbuluar me gjak. Njerëzit duhet ta marrin atë”.

Viktori filloi ta mbyllte qesen e trupit vetë, dhe më pas ndihmësit e morën.

Teksa fqinjët shikonin dhe autoritetet filluan rutinën e tyre të zakonshme të hetimit, Viktori u la vetëm në një stol të qante.

“Pse u vranë këta njerëz? E tmerrshme. Jam i mërzitur nga kjo”, tha fqinji Sergey Pershin. “Çdo natë zgjohemi 10 herë dhe presim kur ata fillojnë të gjuajnë. Çfarë po bëjnë këta maskarenj? Ka ndërtesa me banorë këtu. Pse po gjuajnë këtu. Nuk ka asgjë këtu”.

Është vetëm një ditë në Kharkiv, ku qindra kanë vdekur në 19 javë lufte. Ndërsa Rusia rigrumbullon trupat duke u përpjekur të pushtojë më shumë territor në lindje të Ukrainës, është e sigurt të thuhet se më shumë të vdekur do të ketë.

Deri të dielën, zyra për të drejtat e njeriut e Kombeve të Bashkuara ka verifikuar të paktën 4889 civilë të vrarë në Ukrainë që nga pushtimi rus në shkurt, një numër që me shumë gjasë nuk përfaqëson totalin real.