Ministri belg i Mbrojtjes: Nëse Brukseli sulmohet, Moska do të rrafshohet

Ministri belg i Mbrojtjes, Theo Francken, ka thënë se NATO-ja do ta “rrafshonte Moskën” nëse Rusia do të sulmonte Brukselin.

Në një intervistë për gazetën De Morgen, Francken ka prekur një sërë çështjesh strategjike të nxehta, duke përfshirë luftën në Ukrainë, mbrojtjen evropiane, luftën hibride dhe parandalimin bërthamor.

I pyetur nëse kishte frikë se presidenti rus, Vladimir Putin mund të niste një sulm me raketa konvencionale në Bruksel, përgjigjja e tij ishte e qartë.

“Jo, sepse atëherë ai do të godiste zemrën e NATO-s, dhe pastaj ne do ta rrafshonim Moskën”, është shprehur Francken.

Ai ka shprehur mbështetje të fortë për udhëheqjen e SHBA-së në NATO dhe ka përsëritur besimin e tij në Nenin 5, klauzolën e mbrojtjes së ndërsjellë që mbështet aleancën.

Ndërkohë, duke iu përgjigjur pyetjes nëse presidenti i SHBA-së, Donald Trump, do ta respektonte Nenin 5, Francken ka thënë se beson që po.

Edhe Botë 22 sht 2026 Inteligjenca evropiane paralajmëron për veprime vendimtare të Moskës kundër NATO-s

“Sigurisht që do ta bënte. Ekziston një paragjykim i madh në Evropë kundër qeverisë amerikane. Pse të mos e respektojë Nenin 5?”, ka deklaruar ai.

Francken ka shtuar se ishte më i shqetësuar për përdorimin e luftës hibride nga Rusia sesa për kërcënimin e sulmeve konvencionale.