Ligjvënësit demokratë do të paraqesin projektligjin që synon ndalimin e eliminimit të USAID-it

Një grup ligjvënësish demokratë amerikanë do të prezantojnë një projektligj të martën që synon të ndalojë administratën Trump nga përdorimi i fondeve qeveritare për të eliminuar Agjencinë e SHBA-së për Zhvillim Ndërkombëtar (USAID), i ka thënë Reuters një nga sponsorizuesit e projektligjit.

Projektligji, i cili nuk është raportuar më parë, parasheh se vetëm një akt i Kongresit mund ta eliminojë USAID-in si agjenci e pavarur, dhe se çdo reformë duhet të bëhet në përputhje me ligjin. Demokratët kanë thënë se veprimet e presidentit Trump për shpërbërjen e agjencisë janë të paligjshme.

Sara Jacobs, e cila drejton projektligjin e bashkësponsorizuar nga 15 demokratë të tjerë, i ka thënë Reuters se masa do të ndalonte administratën të përdorë fondet e qeverisë së SHBA-së për të paguar pagat për ata që punojnë për të eliminuar USAID-in si një agjenci e pavarur, duke përfshirë punonjësit e Departamentit të Efiçencës së Qeverisë të Elon Muskut.

Megjithëse projektligji mund të përballet me një rrugë të vështirë si në Dhomën e Përfaqësuesve ashtu edhe në Senat, nëse ai bëhet ligj, sekretari i Shtetit do të duhet të vërtetojë pajtueshmërinë brenda 30 ditëve nga miratimi i tij, dhe çdo pesë vjet pas kësaj.

USAID-i, agjencia kryesore humanitare e SHBA-së, është bërë objektivi i parë i departamentit të udhëhequr nga miliarderi Musk për të zvogëluar madhësinë e qeverisë amerikane.

“Është e paligjshme të shpërbësh USAID-in. Ajo që Elon Musk po bën tashmë, është e paligjshme”, ka deklaruar Jacobs. 

Për t'u bërë ligj, projektligji do të duhet të kalojë Dhomën dhe Senatin e kontrolluar nga republikanët dhe të nënshkruhet nga Trumpi.

Qindra programe që mbulojnë miliarda dollarë ndihma për shpëtimin e jetës në të gjithë globin u ndalën pasi Trumpi, më 20 janar, urdhëroi ngrirjen e pjesës më të madhe të ndihmës së huaj të SHBA-së, duke thënë se donte të siguronte që ajo të përputhej me politikën e tij "Amerika së pari".

LEXO EDHE: