Gjykatësi vendos se shpërbërja e USAID-it mund të përbëjë shkelje kushtetuese

Një gjykatës federal ka vendosur të martën se shpërbërja e Agjencisë për Zhvillim Ndërkombëtar (USAID) të Shteteve të Bashkuara të Amerikës me shumë gjasë përbën shkelje kushtetuese dhe ka bllokuar Departamentin e Efikasitetit Qeveritar të udhëhequr nga miliarderi Elon Musk që të bëjë shkurtime të tjera në agjenci, transmeton agjencia AP.

Gjykatësi i Qarkut të Marylandit, Theodore Chuang e ka urdhëruar administratën e Trumpit që ta rikthejë qasjen e të gjithë punëtorëve të USAID-it nëpër emaila dhe kompjuterë, përfshirë atyre të cilët janë vendosur në largim administrativ.

Padia e veçoi Muskun si të pandehur të mbuluar nga urdhri paraprak, duke argumentuar se ai po ushtronte pushtet që Kushtetuta e rezervon vetëm për ata që fitojnë zgjedhjet ose konfirmohen nga Senati.

Urdhri vjen në kuadër të një padie të ngritur nga avokatët e punonjësve dhe kontraktuesve të USAID-it.

Chuang ka thënë që provat sugjerojnë se Musku ka marrë vendime për të mbyllur selinë e USAID-it dhe faqen e internetit, pavarësisht pretendimeve të administratës se ai ishte thjesht këshilltar i presidentit Donald Trump. Qëndrimet publike të Muskut dhe postimet e tij në rrjetet sociale dëshmojnë se ai ka “kontroll të plotë mbi Departamentin e Efikasitetit Qeveritar”, ka konkluduar gjykatësi federal.  

Edhe Botë 7 shk 2025 Nga 10,000 në 294 punëtorë për USAID-in

Presidenti Donald Trump më 20 janar pati lëshuar një urdhër ekzekutiv për ngrirje të ndihmës së huaj dhe një rishikim të dhjetëra miliarda dollarëve të ndihmës së SHBA-së që jep jashtë vendit. Trump ka thënë se pjesa më e madhe e ndihmës së huaj ishte e kotë.

Përveç shkurtimeve në staf, rreth 5,200 nga 6,200 programet e USAID-it janë eliminuar.