Kryeministri indian redukton eskortën e tij për të kursyer naftën

Kryeministri indian, Narendra Modi ka zvogëluar ndjeshëm madhësinë e eskortës së tij për të kursyer karburant, ka thënë një burim qeveritar të mërkurën, disa ditë pasi ai u kërkoi qytetarëve të përgatiten, për rritjen e çmimeve të energjisë, të shkaktuar nga lufta me Iranin.

Modi u ka bërë thirrje qytetarëve të dielën të adoptojnë masa kursimi, duke përfshirë shmangien e udhëtimeve të panevojshme jashtë vendit, përdorimin e transportit publik, reduktimin e blerjeve të arit dhe uljen e përdorimit të vajit të gatimit, ndërsa rritja e çmimeve globale të energjisë po ushtron presion mbi rezervat valutore të vendit.

Pas kësaj thirrjeje, disa kritikë në rrjetet sociale vunë në pikëpyetje eskortat e mëdha të politikanëve të lartë indianë, fluturimet e brendshme të Modit, dhe vizitën e tij të ardhshme në Evropë me avionin zyrtar.

Numri i automjeteve në eskortën e Modit është zvogëluar duke ruajtur komponentët thelbësorë të sigurisë, në përputhje me protokollet e Grupit Special të Mbrojtjes që ruan kryeministrin, ka thënë burimi për Reuters pa specifikuar madhësinë aktuale të eskortës.

Modi gëzon nivelin më të lartë të sigurisë personale në vend dhe eskorta e tij njihej se kishte dhjetëra automjete para këtij reduktimi.

Sipas burimit, Modi reduktoi eskortën e tij gjatë vizitave të kësaj jave në shtetin e tij të lindjes, Gujarat, dhe në shtetin verilindor të Assam. Gjithashtu, ai ka kërkuar që automjetet elektrike të përfshihen në eskortë aty ku është e mundur, por pa bërë blerje të reja.

India, importuesi dhe konsumatori i tretë më i madh i naftës në botë, varet shumë nga Ngushtica e Hormuzit, e mbyllur nga lufta SHBA-Izrael kundër Iranit, për furnizimet me naftë bruto, gaz natyror të lëngshëm dhe gaz për gatim.

India deri tani ka shmangur rritjen e çmimeve të benzinës dhe naftës, por kjo parashihet se nuk mund të shtyhet edhe për shumë kohë për shkak të situatës në Lindjen e Mesme.