Grupi i mbështetur nga Irani, Houthi, ka thënë të shtunën se një sulm ajror nga Izraeli e ka vrarë kryeministrin e qeverisë së kontrolluar nga rebelët në kryeqytetin e Jemenit, Sanaa.
Ahmed al-Rahawi u vra të enjten nga një sulm në Sanaa, krahas një numri të ministrave, sipas komunikatës së këtij grupi.
Ushtria e Izraelit ndërkaq ka thënë të enjten se “sulmi qe i saktë në një cak të regjimit terrorist të Houthive në Sanaa”.
Al-Rahawi, që ka shërbyer si kryeministër i kësaj qeverie që nga muaji gusht 2024, ishte cak krahas anëtarëve të tjerë të qeverisë së kontrolluar të Houthive gjatë një punëtorie të mbajtur nga qeveria, për performancën e vitit të kaluar, sipas komunikatës.
Houthi në vazhdimësi ka lëshuar raketa ndaj Izraelit përgjatë luftës së Izraelit ndaj Hamasit në Gaza.
Grupi ka thënë se po e sulmon Izraelin në solidaritet me palestinezët.