Izraeli lejon evakuimin e parë mjekësor nga Gaza në gati 2 muaj

Autoritetet izraelite kanë bërë të ditur se 68 persona, 19 fëmijë të sëmurë ose të plagosur dhe shoqëruesit e tyre, janë lejuar të largohen nga Rripi i Gazës për në Egjipt. 

Ky është evakuimi i parë mjekësor që nga fillimi i majit, kur kalimi i vetëm i udhëtimit në territor u mbyll pasi Izraeli e pushtoi atë.

Lufta gati nëntë-mujore Izrael-Hamas ka shkatërruar sektorin shëndetësor të Gazës dhe ka detyruar shumicën e spitaleve të saj të mbyllen. Zyrtarët shëndetësorë thonë se mijëra njerëz kanë nevojë për trajtim mjekësor jashtë vendit, duke përfshirë qindra raste urgjente, raporton Associated Press.

Organi ushtarak izraelit përgjegjës për çështjet civile palestineze, i njohur me akronimin e tij COGAT,  ka njoftuar se evakuimi u krye në koordinim me zyrtarë nga Shtetet e Bashkuara, Egjipti dhe komuniteti ndërkombëtar.

Fëmijët dhe shoqëruesit e tyre u larguan nga Gaza përmes vendkalimit të ngarkesave Kerem Shalom dhe pacientët do të udhëtonin në Egjipt dhe më tej jashtë vendit për trajtim mjekësor.  

Një organizatë izraelite për të drejtat e njeriut, i ka kërkuar Gjykatës Supreme të Izraelit të krijojë një mekanizëm të përhershëm për të lejuar njerëzit që kanë nevojë për trajtim mjekësor të evakuohen nga Gaza.