Irani dhe grupi evropian E3 zhvillojnë bisedime të hapura për programin bërthamor

Teherani zyrtar ka njoftuar se do të vazhdojë bisedimet për programin bërthamor me vendet evropiane, pas një takimi që u zhvillua të premten, të cilin e cilësuan si serioz, të hapur dhe të detajuar. 

Ky është takimi i parë ballë për ballë që nga sulmet ajrore të kryera muajin e kaluar nga Izraeli dhe Shtetet e Bashkuara ndaj Iranit. 

Para takimit në Stamboll, Irani kundërshtoi propozimet për zgjatjen e një rezolute të Kombeve të Bashkuara, e cila miraton marrëveshjen e vitit 2015 për kufizimin e programit bërthamor të Iranit. 

Rezoluta është drejt skadimit. Delegacione nga Bashkimi Evropian dhe grupi i ashtuquajtur E3, që përfshin Francën, Britaninë dhe Gjermaninë, u takuan për rreth katër orë me përfaqësues iranianë në konsullatën iraniane. 

Sipas Agjencisë Ndërkombëtare për Energjinë Bërthamore, ky takim mund të krijojë mundësinë për rifillimin e inspektimeve në objektet bërthamore të Iranit.