Gjermania e vlerëson si “nivel të ri rreziku” dronin me eksplozivë në aeroportin e saj

Ministri i Brendshëm gjerman, Alexander Dobrindt, ka paralajmëruar se zbulimi i një droni që mbante eksplozivë në aeroportin Leipzig/Halle shënon "një nivel të ri rreziku" për vendin, ndërsa autoritetet po shqyrtojnë nëse sulmi i parandaluar mund të jetë planifikuar nga një fuqi e huaj.

Zbulimi i një droni të vogël me eksplozivë në aeroportin që është një qendër kryesore logjistike dhe ushtarake, ka shkaktuar alarm dhe devijime të fluturimeve të mërkurën në mëngjes. Policia gjermane ka dërguar një robot për asgjësimin e bombave, për të çaktivizuar dhe shkatërruar pajisjen shpërthyese.

Në deklaratat publike të së mërkurës në mbrëmje, ministri Dobrindt, ka thënë se incidenti nuk dukej të ishte vepër amatorësh dhe se hetuesit po e trajtonin atë si pjesë të një "skenari profesional të kërcënimit hibrid".

"Këtu kemi të bëjmë me një rivalitet që mund të përfshijë edhe fuqi të huaja, kjo do të jetë pjesë e hetimeve, të cilat dukshëm duan të kontribuojnë në një pasiguri të konsiderueshme në Gjermani”, ka thënë Dobrindt.

Një avion mallrash i kompanisë DHL është përplasur me një objekt të panjohur në ajër ndërsa po ngrihej dhe largohej nga aeroporti. Më vonë, avioni është ulur i sigurt në një vend tjetër.

Edhe Botë 1 sht 2026 Gjermania akuzon Rusinë për sulmin me dronë në aeroportin e Leipzigut

Dobrindt dhe zyrtarë të tjerë gjermanë nuk e kanë përmendur shprehimisht Rusinë si të dyshuar të mundshëm në deklaratat e tyre. Megjithatë, statusi i aeroportit si qendër logjistike ushtarake e NATO-s dhe Gjermanisë, si dhe bazë për kompaninë ukrainase "Antonov Airlines" në Evropë, i ka drejtuar dyshimet te Rusia, e cila edhe më parë është akuzuar për kryerjen e sulmeve sabotuese në Evropë.

Ekspertët e sigurisë kanë thënë se incidenti mund të përbënte një përshkallëzim serioz të tensioneve me Rusinë, nëse vërtetohej se Kremlini kishte luajtur ndonjë rol.