Parlamenti i Gjeorgjisë pritet të japë miratimin final për një ligj të diskutueshëm për “agjentët e huaj” që shkaktoi javë protestash masive në rrugë, ka raportuar BBC-ja.
Kritikët kanë thënë se një ligj i tillë, i konsideruar si “ligji i Rusisë”, mund të shfrytëzohet për t’i shtypur mospajtimet, duke kërkuar që Qeveria të anulojë kalimin e ligjit. Një protestë masive është paralajmëruar të mbahet para dyerve të Parlamentit, derisa kryeministri i vendit, Irakli Kobakhidze, është zotuar se ligji do të kalojë.
Sipas tij, nëse autoritetet tërhiqen nga ky lig atëherë Gjeorgjia “do të humbasë sovranitetin dhe lehtësisht mund të ketë fatin e Ukrainës”.
Në natën e tretë të protestës, mijëra demonstrues, shumica prej tyre studentë, u mblodhën jashtë parlamentit në Tbilisi dhe kërkuan rrëzimin e ligjit. Një pjesë e protestuesve u përlesh me policinë.
Ky projektligj thotë se organizatat dhe mediat e pavarura që marrin mbi 20 për qind të financimit nga donatorët e huaj duhet të regjistrohen si organizata “që mbajnë interesat e një fuqie të huaj”.
Ato gjithashtu do të monitorohen nga Ministria e Drejtësisë dhe mund të detyrohen të publikojnë “informacione të ndjeshme” ose të përballen me gjoba deri në 9.400 dollarë.
Edhe
Gjeorgjia miraton ligjin kontrovers që njihet si “ligji i Rusisë”
Protestuesit janë të shqetësuar se legjislacioni do të shfrytëzohet nga ekzekutivi për t’i shtypur kundërshtarët dhe për t’i zbehur Gjeorgjisë shpresat për t’u anëtarësuar në Bashkimin Evropian.
Gjeorgjia e kishte shpallur pavarësinë pas shpërbërjes së Bashkimit Sovjetik.
