Fuqitë botërore lëshojnë rezerva nafte në vlera rekorde teksa vazhdojnë sulmet ndaj anijeve në Hormuz

Agjencia Ndërkombëtare e Energjisë (IEA) ka miratuar lirimin e 400 milionë fuçive naftë për të kompensuar furnizimin e humbur nga mbyllja e Ngushticës së Hormuzit, ka njoftuar të mërkurën drejtori ekzekutiv i saj, Fatih Birol.

Ai ka thënë se vendet e IEA-s votuan "unanimisht" për të nisur "lirimin më të madh ndonjëherë të rezervave të naftës emergjente në historinë e agjencisë sonë".

“Sfidat e tregut të naftës me të cilat po përballemi janë të pashembullta në shkallë të gjerë, prandaj jam shumë i kënaqur që vendet anëtare të IEA-s kanë reaguar me një veprim kolektiv emergjent me përmasa të pashembullta”, ka deklaruar Birol.

IEA thotë se rezervat e emergjencës do të vihen në dispozicion të tregut gjatë një "afati kohor që është i përshtatshëm për rrethanat kombëtare" të secilit vend anëtar.

Është hera e gjashtë që IEA ka miratuar një lëshim të koordinuar të rezervave të naftës, pasi më parë e ka bërë këtë në vitet 1991, 2005, 2011 dhe dy herë në vitin 2022.

Sipas agjencisë, anëtarët e saj mbajnë rezerva emergjence prej më shumë se 1.2 miliardë fuçish.

Edhe Botë 11 mar 2026 Irani paralajmëron botën: Përgatituni për dyfishim të çmimit të naftës

Vendimi vjen pak pasi Irani paralajmëroi për dyfishim të çmimit të naftës, dhe pas sulmeve të tij ndaj anijeve komerciale në Ngushticën e Hormuzit. 

Agjencia Ndërkombëtare e Energjisë përbëhet nga 32 vende anëtare, përfshirë SHBA-në, Britaninë, Gjermaninë, Francën, Turqinë, Kanadanë, Meksikën, Korenë e Jugut e Japoninë.