Mjegulla e dendur u ka mundësuar trupave ruse të depërtojnë më thellë në qytetin kyç strategjik të Pokrovskut në Ukrainën lindore.
Ushtria ukrainase ka thënë se kushtet e motit, veçanërisht mjegulla e dendur, e kanë shtyrë Moskën të intensifikojë përpjekjet për të futur numër gjithnjë e më të madh ushtarësh në qytetin e rrënuar dhe për të rrethuar forcat ukrainase.
Forcat ruse kanë kaluar më shumë se një vit duke u përpjekur ta pushtojnë qytetin. Ushtria e Ukrainës thotë se tani mund të ketë 300-500 rusë në qytet dhe presidenti Voloydymyr Zelensky u shpreh se situata mbetet e vështirë.
Ndërkohë, shefi i ushtrisë Oleksandr Syrskyi ka thënë se situata në vijën e frontit në rajonin juglindor të Zaporizhzhias është “përkeqësuar ndjeshëm”, me humbjen e tre vendbanimeve.
Syrskyi ka deklaruar megjithatë se Rusia ishte më aktive rreth Pokrovskut.
Një video është bërë virale në rrjetet sociale që tregon ushtarë rusë duke vrapuar nëpër rrugë të mjegullt me vetura dhe motoçikleta civile. BBC-ja ka verifikuar vendndodhjen ku është filmuar videoja, si periferia jugore e qytetit në autostradën Selidove-Pokrovsk. Ukraina pretendon se ka sprapsur sulmin, por megjithatë nuk janë të sigurt nëse i gjithë grupi u godit.
Për disa ditë me radhë mjegulla pengonte shikueshmërinë për të kryer zbulime ajrore, ka thënë një pilot droni nga njësia ushtarake ukrainase.
Kjo është arsyeja pse rusët madje kishin “guxuar” të nisnin sulme duke përdorur një kolonë automjetesh, të cilat normalisht do të ishin eliminuar menjëherë nga dronët ukrainas.
Piloti i dronit ukrainas zbuloi se njësia e tij kishte zbuluar dhe eliminuar rregullisht grupe të vogla ruse që përpiqeshin të përparonin në këmbë dhe me motoçikleta.