Del para gjyqit ish-krahu i djathtë i Zelenskyt, i akuzuar për korrupsion

Ish-krahu i djathtë i presidentit ukrainas, Volodymyr Zelensky, Andriy Yermak, është paraqitur në një gjykatë në Kiev të martën, nën akuzat për një skemë pastrimi parash.

Avokati i Yermak më parë kishte denoncuar si "të pabaza" akuzat se ish-kreu i zyrës presidenciale ishte përfshirë në një skandal korrupsioni që kishte të bënte me një projekt ndërtimi luksoz prej 10.5 milionë dollarësh jashtë Kievit.

Disa orë para seancës gjyqësore, Yermak u ka thënë gazetarëve se "Nuk kam shtëpi, kam vetëm një apartament dhe një makinë".

Për vite me radhë ai ishte një mik i ngushtë i Zelenskyt dhe udhëhoqi bisedimet e Ukrainës me SHBA-në derisa një bastisje anti-korrupsion në apartamentin e tij nëntorin e kaluar shkaktoi dorëheqjen e tij.

Zyra e Prokurorit Kundër Korrupsionit e Ukrainës (Sapo) ka thënë se po i kërkonte gjykatës së Kievit që ose ta vendoste atë në paraburgim parandalues ose t'i jepte lirim me kusht, kundrejt një pagese prej 4 milionë dollarësh. 

Kreu i Byrosë Kombëtare Antikorrupsion (Nabu) ka theksuar se vetë Zelensky nuk ishte pjesë e hetimit paraprak.

Yermak kishte qenë këshilltari më i ngushtë i presidentit gjatë gjithë pushtimit të plotë të Rusisë, derisa u përfshi në një hetim më të gjerë nga Sapo dhe Nabu për një skemë të dyshuar përvetësimi prej 100 milionë dollarësh në sektorin e energjisë bërthamore të Ukrainës.

Ai nuk është akuzuar dhe as nuk është emëruar zyrtarisht si i dyshuar në atë kohë, megjithatë akuzat e shumta kanë hedhur një hije mbi përpjekjen e Ukrainës për t'u bashkuar me Bashkimin Evropian.

Vitin e kaluar, Zelensky është detyruar të shfuqizonte një ligj që dobësonte pavarësinë e dy agjencive antikorrupsion, pas protestave dhe kritikave të gjera nga BE-ja. 

Si pjesë e Operacionit Midas, ish-zëvendëskryeministri Oleksiy Chernyshov u akuzua për shpërdorim detyre, ndërsa biznesmeni Timur Mindich thuhet se iku nga vendi pasi u sinjalizua si i dyshuar dhe ish-ministri i Energjisë, Herman Haluschenko u ndalua ndërsa përpiqej të largohej.

Ashtu si Yermak, Mindich dikur ishte pjesë e rrethit të ngushtë të Zelenskyt dhe bashkëpronar i ish-studios televizive të presidentit Kvartal95, përpara se të vendoseshin sanksione ndaj tij. Mindich mohon çdo shkelje.

Pretendimet e fundit përqendrohen në një projekt elitar strehimi të quajtur "Dinastia" në një fshat jashtë Kievit ku dyshohet se u pastruan miliona në fonde ndërtimi. Byroja antikorrupsion ndau një pjesë të një bisede të përgjuar si pjesë të çështjes së saj dhe tha se gjashtë persona të tjerë ishin identifikuar si të dyshuar.

Avokati mbrojtës i Yermak, Ihor Fomin, i ka thënë transmetuesit publik Suspilne të Ukrainës të martën se akuzat "e pabaza" kundër ish-shefit të stafit ishin shkaktuar të gjitha nga presioni publik, të cilin ai nuk e kishte parë kurrë më parë.

"Kur të mbarojnë veprimet hetimore, do të jap një koment”, u ka thënë Yermak gazetarëve të hënën në mbrëmje.