Carney kërkon që Franca dhe Evropa ta ndihmojnë të ruajë marrëdhëniet me SHBA-në

Kryeministri i ri kanadez, Mark Carney, ka thënë të hënën se dëshiron të sigurojë që vendi i tij të punojë me Francën dhe pjesën tjetër të Evropës për të ruajtur "marrëdhëniet më pozitive të mundshme" me Shtetet e Bashkuara.

Teksa po fliste në një konferencë të përbashkët shtypi me presidentin francez, Emmanuel Macron në Paris, Carney ka thënë se Kanadaja është "vendi më evropian nga vendet jo-evropiane", dhe se ajo është "një partner i besueshëm dhe i fortë i Francës", raporton AP.

Carney ka mbërritur në Paris të hënën për t'u takuar me Macronin, duke kërkuar mbështetje nga një prej aleatëve më të vjetër të Kanadasë, teksa presidenti i SHBA-së, Donald Trump vazhdon të sulmojë sovranitetin dhe ekonominë e Kanadasë.

Ky është udhëtimi i parë zyrtar jashtë vendit i Carney që kur është betuar më 14 mars.

Ai do të zbarkojë më pas në Londër ku do të takohet me kryeministrin e Mbretërisë së Bashkuar Keir Starmer dhe mbretin Charles III, kreun e shtetit në Kanadasë.