Карни бара од Франција и Европа да му помогнат да ги одржува односите со САД

Новиот канадски премиер Марк Карни во понеделникот изјави дека сака да обезбеди неговата земја да работи со Франција и остатокот од Европа за да ги одржи „најпозитивните можни односи“ со Соединетите држави.

Говорејќи на заедничката прес-конференција со францускиот претседател Емануел Макрон во Париз, Карни рече дека Канада е „најевропската од неевропските земји“ и дека е „доверлив и силен партнер на Франција“, пренесува АП.

Карни пристигна во Париз во понеделникот за да се сретне со Макрон, барајќи поддршка од еден од најстарите сојузници на Канада додека американскиот претседател Доналд Трамп продолжува да го напаѓа суверенитетот и економијата на Канада.

Ова е прво официјално патување на Карни во странство откако положи заклетва на 14 март.

Потоа ќе слета во Лондон каде ќе се сретне со премиерот на Обединетото Кралство Кир Стармер и со кралот Чарлс Трети, шефот на државата во Канада.