Ambasadorët e BE-së, SHBA-së dhe Britanisë nuk marrin pjesë në inaugurimin e Putinit

Bashkimi Evropian nuk ka marrë pjesë në ceremoninë e inaugurimit të presidentit të Rusisë, Vladimir Putin, i cili të martën mori detyrën për të pestën herë.

Zëdhënësi i Komisionit Evropian, Peter Stano ka thënë se “kreu jonë i delegacionit, ambasadori i BE-së nuk është atje”. Sipas Stanos, ai është udhëzuar të mos shkojë, raporton AP.

Putini e ka nisur mandatin e tij të pestë në një ceremoni inaugurimi të martën, duke qenë lider i Rusisë edhe për gjashtë vjet të tjera, pasi i shkatërroi kundërshtarët e tij politikë, duke nisur një luftë në Ukrainë dhe duke e koncentruar gjithë fuqinë në duart e tij.

As ambasadorët e SHBA-së apo të Britanisë nuk kanë marrë pjesë në inaugurim.

Ambasada e SHBA-së ka thënë se ambasadori Lynne Tracy ishte “jashtë shtetit, në një udhëtim personal të paracaktuar”.

Ambasadori i Francës ishte prezent, sipas një diplomati francez i cili ka folur në kushtet anonimiteti.