4.676 ukrainas u evakuuan të enjten

4.676 banorë janë zhvendosur të enjten përmes korridoreve të evakuimit, ka njoftuar zëvendëskryeministrja ukrainase, Iryna Vereshchuk.

Ajo ka bërë të ditur se 3.256 banorë janë larguar nga zonat e Mariupolit, Polohyt, Vasylivkas, Berdianskut dhe Melitopolit, të cilët janë drejtuar për në Zaporizhzhia, raportoi CNN-i.

Ndërkaq, 1.420 të tjerë janë zhvendosur nga qytetet Lisichansk, Severodonetsk, Rubizne dhe Kreminna në rajonin e Luhanskut.

Vereshchuk ka shtuar se nëntë autobusë janë duke shkuar në Melitopol për të ndihmuar me evakuimin e mëtejmë dhe për të ofruar ndihmë humanitare.

“Dy autobusë mbërritën në qytetin Tomak të enjten dhe do të nisen për në Zaporizhzhia të premten. Gjithashtu të premten, autobusët do të dërgohen nga Zaporizhzhia për të evakuuar njerëzit e Berdianskut”, ka thënë Vereshchuk.