-
Nga:
Arsim Maxhera
- 28 tetor 2025 11:29
- Shpërndaje në:
Trepça e Bashkimi kanë të tjera ndeshje të mërkurën. Këtë herë jo mes tyre, por në garën e njëjtë – në FIBA Europe Cup.
Të dy skuadrat e kërkojnë fitoren e parë në stinorin e rregullt të kësaj gare kontinentale.
Në kuadër të Grupit F, kampionia e Kosovës, Trepça, luan në palestrën “Minatori” me skuadrën e njohur polake, Anwil. Kjo ndeshje zhvillohet nga ora 18:30.
Në kuadër të Grupit J, Bashkimi në “Sezai Surroi” nga ora 19:00 e pret skuadrën franceze, Dijon.
Anwili, njëjtë si Trepça ka humbur dy ndeshjet e para.
Në xhiron e parë Anwili humbi 98:97 nga Braunschweigu gjerman, ndërsa Trepça humbi në Greqi nga PAOK-u me shifrat 85:74.
Në xhiron e dytë, të mërkurën e kaluar, Trepça pësoi në shtëpi nga Braunschweigu me shifrat 84:70, kurse Anwili sërish humbi vetëm me një pikë dallim, 94:93, nga PAOK-u në Wloclawek të Polonisë.
Anwili në fakt vetëm kthehet në Kosovë. Në raundin kualifikues kishte pësuar 80:75 nga Bashkimi në Prizren. Por kishte fituar 93:71 në Poloni për të avancuar në stinorin e rregullt. Avancoi edhe Bashkimi, si njëra prej skuadrave më të mira humbëse.
Trepça nuk është në moment të mirë. Pos në FIBA Europe Cup, i ka humbur dy ndeshje edhe në Superligë. Të dielën pësoi pikërisht nga Bashkimi në “Minatori”, ndërsa në arenën e saj kishte pësuar edhe nga Peja.
Bashkimi i Prizrenit në Superligë ka tri fitore rresht. Por ka humbur dy ndeshjet në udhëtim në FIBA Europe Cup. Fillimisht pësoi nga Cibona në Zagreb me 93:79 e javën e kaluar nga Reggiana në Itali me rezultat 100:65. Dy humbje i ka edhe Dijoni. Pësoi 96:88 nga Reggiana në Francë dhe 76:73 nga Cibona në Kroaci.
Fitoret do të mbanin në garë për avancim tutje si Trepçën ashtu edhe Bashkimin. Me humbje të dy skuadrat thuajse do të eliminoheshin.
Në raundin e dytë avancojnë skuadrat që i fitojnë dhjetë grupet dhe po ashtu gjashtë skuadrat më të mira prej dhjetë grupeve sa janë gjithsej.
Trepça ka disa ndeshje rresht që luan para tifozëve të saj. Por palestra “Minatori” nuk po mbushet përplot si në edicionet e kaluara. Në klubin “xehetar” shpresojnë që kjo të ndryshojë shpejt. Një fitore ndaj Anwilit polak do të mund të ndikonte në kthimin e entuziazmit.
Bashkimi ndërkohë shpreson të shfrytëzojë ecurinë e mirë në kampionat për ta mbushur palestrën “Sezai Surroi” për ndeshjen e vështirë me skuadrën franceze.