USAID-i shënon 25-vjetorin e hapjes së zyrës në Kosovë

USAID-i ka shënuar 25-vjetorin e hapjes së zyrës në Kosovë, përmes së cilës janë bërë investime milionëshe në fusha të shumta. Në ceremoninë e organizuar për çerekshekulli prejse USAID-i është operacional në Kosovë, drejtoresha e misionit të USAID-it në Kosovë, Eileen Devitt, ka bërë të ditur se që nga viti 1999 deri më tani në Kosovë kanë investuar mbi 1 miliard dollarë. E përmes një videomesazhi presidentja e vendit, Vjosa Osmani, ka falënderuar këtë agjenci për kontributin e dhënë për zhvillimin e Kosovës.

Viti 1999 ka shënuar zyrtarisht fillimin e punës së USAID-it në Kosovë ani se kjo e fundit kishte filluar të operonte qysh në vitin 1993, përmes organizatave të tjera.

E, këtë të martë USAID-i ka mbajtur një ceremoni për nder të 25-vjetorit të hapjes së zyrës së tyre në Kosovë e në të cilën ishin të pranishëm figura të shumta politike, të shoqërisë civile e fushave të tjera. 
Gjatë kësaj ceremonie të pranishmëve u është drejtuar drejtoresha e misionit të USAID-it në Kosovë, Mary Eileen Devitt, ambasadori amerikan në Kosovë, Jeffrey Hovenier, ndërsa përmes një videomesazhi atyre u është drejtuar presidentja e vendit, Vjosa Osmani. 

Drejtoresha e USAID, Devitt, ka theksuar se investimet e kësaj agjencie në Kosovë kapin vlerën e 1 miliard dollarëve dhe se angazhimi i USAID-it do të vazhdojë tutje. 

“Është thelbësore që Kosova të mbetet  e përkushtuar për vlerat multietnike, gjithëpërfshirëse dhe demokratike, duke përfshirë gratë, të rinjtë dhe minoritetet që kombinojnë prosperitetin dhe mundësitë.  Në përfundim dua të shpreh përkushtimin e USAID-it për njerëzit e Kosovës, për të vazhduar punën së bashku në partneritet që t’i përmbushim ambiciet dhe qëllimet tona viteve që do të vijnë”, tha Devitt.

E ambasadori Hovenier ka deklaruar se në vitin ‘99 nuk e kishin paramenduar një zhvillim kaq të shpejtë të Kosovës. 

Edhe Arbëri 21 nën 2024 Osmani: Trashëgimia transformuese e USAID-it e dukshme në çdo cep të Kosovës

“Ka qenë tejet e vështirë të dinim se si t’i ndihmonim njerëzit e Kosovës në atë kontekst. Për të ndihmuar për të sjellë një ta ardhme më të ndritshme që ne donim....Derisa progresi ende duhet të arrihet, nëse kthehemi dhe e mendoj se si dukej korriku apo gushti i vitit 1999, krahasuar me korrikun apo gushtin e vitit 2024, arritja është e madhe”, tha Hovenier. 

Ndërsa përmes një videomesazhi presidentja e vendit është shprehur mirënjohëse ndaj USAID-it për punën e bërë të Kosovë gjatë këtyre viteve. 

“Sonte, partnerëve të USAID-it ju themi faleminderit nga thellësia e zemrës. Ju falënderojmë jo vetëm se çfarë keni bërë por edhe për çfarë qëndruat. Përkushtimi juaj për vlerat e përbashkëta, besimi në njerëzit tanë, dhe qëndrimi me ne në kohërat më të vështira dhe momente më të ndritura”, tha Osmani.

Investimet e USAID-it në Kosovë prekin fusha të ndryshme, duke filluar nga mbështetja e mediave të pavarura, zhvillimin ekonomik, posaçërisht në sektorin privat, investimet në infrastrukturë, sundim të ligjit etj. 

Edhe LAJMET E MBRËMJES 21 gus 2024 Osmani: Sa herë që punojmë bashkë me SHBA-në, qytetarët e shteti përfitojnë

Kosova ka nënshkruar një marrëveshje me këtë agjenci në muajin gusht të këtij viti, grant ky që kap vlerën e 34.5 milionë dollarëve. 

Në kuadër të këtij 25-vjetori USAID-i do të mbajë aktivitete të shumta në qytete të ndryshme të Kosovës, javëve dhe muajve në vazhdim.