Universiteti i Prishtinës “Hasan Prishtina”, me një ceremoni solemne, shënoi 49 vjetorin e themelimit të tij.
Në këtë solemnitet u vlerësua lart roli i vital i Universitetit të Prishtinës në shtetformimin e Kosovës, që nga themelimi i këtij institucioni në vitin 1970, si dhe progresi i viteve të fundit.
Rektori i Universitetit të Prishtinës “Hasan Prishtina”, Marjan Dema, ndër të tjera u shpreh se përvjetori i UP-së, çdoherë risjell ndjenja krenarie, nostalgjie dhe gëzimi, tek kushdo që ka qenë dhe është pjesë e historisë së Universitetit të Prishtinës. Gjithashtu, ai theksoi se historia e Universitetit të Prishtinës është vetë historia e Kosovës.
“Universiteti i Prishtinës, që nga themelimi, vazhdon të jetë zgjedhja e parë e studentëve të vendit tonë. Prej këtej, UP-ja ka bartur ndër vite barrën kryesore të edukimit dhe zhvillimit të shoqërisë kosovare”, tha Dema.
Ai foli edhe për progresin që UP-ja ka shënuar viteve të fundit, duke konstatuar se ai është ngritur mbi vlerat themelore të arsimit të lartë, siç janë: integriteti, qasja e barabartë për të gjithë, përgjegjësia, llogaridhënia, liria akademike, transparenca dhe përgjegjësia sociale.
Edhe
Në përvjetorin e UP-së më shumë u fol për kaluarën heroike, sesa për rolin e ri
“Progresi i UP-së është evident. Gjatë këtij viti, qendrat dhe zyrat, që themeluam në më pak se gjysmë-dekadën e fundit, tejkaluan edhe vetë pritjet tona me progresin e bërë. Mësimdhënia, inovacioni dhe ndërkombëtarizimi janë kryefjalë tani më shumë se kurrë më parë në institucionin tone”, theksoi më tej rektori Dema.
49 vjetorin e themelimit të UP-së, e uroi edhe kryetari i Kuvendit të Kosovës, Kadri Veseli, i cili tha se UP-ja është më shumë se tempull i dijes dhe i shkencës.
“Është bërë e zakonshme që universitetet të quhen tempuj të diturisë dhe shkencës, mirëpo Universiteti i Prishtinës, në historinë e tij, është më shumë se kaq. Që nga fillimet e tij, ai ishte tempull i vetëdijes sonë kombëtare. Sot UP-ja mbush 49 vjet, bëhen 20 vjet nga fitimi i lirisë dhe 11 vjet nga shpallja e Pavarësisë së Republikës së Kosovës. Ky është bilanci i kontributit të Universitetit të Prishtinës në më pak se 5 dekada ekzistencë”, deklaroi Veseli.
Ditën e Universitetit në këtë ceremoni e uruan edhe zëvendësministri i Arsimit, Shkencës dhe Teknologjisë, Heset Sahiti, rektori i Universitetit të Mjekësisë në Tiranë, profesor Arben Gjata, në emër të rektorëve të Shqipërisë si dhe në emër të rektorëve të Maqedonisë, profesor Vullnet Ameti, rektor i Universitetit të Tetovës. Gjithashtu, të pranishmëve iu drejtua me fjalë rasti edhe nënkryetari i Parlamentit Studentor, Melos Kolshi.
Edhe
Akademia feston gjysmëshekullin si institucion shtetformues e emancipues
Universiteti i Prishtinës gjatë ceremonisë shpërbleu me mirënjohje edhe profesorët: Bajram Berisha, Fetah Podvorica, Gani Bajraktari dhe Lul Raka, për arritje të lartë akademike dhe kontribut të çmuar në ngritjen e Universitetit të Prishtinës në ranglista ndërkombëtare të vlerësimit të universiteteve.
Universiteti i Prishtinës është themeluar me Ligjin mbi Themelimin e Universitetit të Prishtinës, të cilin e miratoi Kuvendi i Krahinës Socialiste të Kosovës, më 18 nëntor 1969. Themelimi i Universitetit të Prishtinës ishte ngjarje historike për popullin e Kosovës, si edhe për mbarë kombin shqiptar. Kuvendi themelues i Universitetit të Prishtinës u mbajt më 13 shkurt 1970, kurse dy ditë më vonë, më 15 shkurt 1970, u mbajt edhe mbledhja solemne e Kuvendit dhe pikërisht kjo datë u shpall Dita e Universitetit të Prishtinës. Aktualisht, UP ka 42.006 studentë, mbi 1.000 pjesëtarë të stafit akademik dhe me afro 350 pjesëtarë të stafit administrativ, të shpërndarë në 13 njësi akademike.
