Shprehet drojë se BE-ja do ta vonojë heqjen e masave

Njohës të çështjeve politike vlerësojnë se Bashkimi Evropian do ta vonojë heqjen e masave ndaj Kosovën edhe pas transferimit të kryetarëve serbë në komunat në veri. Sipas tyre, BE-ja mund t’i përdorë këto masa edhe për kërkesa të tjera ndaj Kosovës.

Të premten e 5 dhjetorit Kosova mund të përmbushë kushtin kryesor të Bashkimit Evropian për heqje të masave, e që është evidentuar edhe në draftin e konkluzioneve për zgjerim. Këtë ditë është planifikuar që kryetarët e rinj serbë të komunave të veriut, t’i marrin mandatet.

Por, njohës të çështjeve politike shprehen skeptikë se heqja e masave do të ndodhë menjëherë pas transferimit të rregullt të pushtetit lokal në veri.

Korrespodenti i KOHËS në Bruksel, Augustin Palokaj, thotë se heqja e këtyre masave të BE-së, mund të ndodhë tek pas zgjedhjeve të parakohshme parlamentare, për të mos u përdorur politikisht nga asnjëra palë në Kosovë.

“Për mendimin tim kjo do të shihet tash e tutje si test për heqjen e këtyre masave, por nuk besoj se do të ndodhë para zgjedhjeve të 28 dhjetorit, pasi ka shumë diplomatë që mendojnë se situata në veri për një kohë shumë të gjatë është shfrytëzuar edhe për përplasjet politike në Kosovë”, ka thënë Palokaj.

Heqje të plotë e të menjëhershme të tyre nuk pret as njohësi i çështjeve politike, Basri Muja, i cili thotë se BE-ja e ka përdorur vazhdimisht si mjet shantazhi heqjen e masave.

“Konstituimi i kryetarëve të rinj më 5 dhjetor sigurisht që përbën një hap pozitiv dhe e forcon argumentin se institucionet në veri po rikthehen në normalitet. Megjithatë është e vështirë të pritet që masat të hiqen menjëherë. BE-ja sinjalizon që pos konstituimit kërkohet edhe zbatimi i qëndrueshëm i marrëveshjeve të Bratislavës të vitit 2023 dhe i detyrimeve lidhur me normalizimin e marrëdhënieve Kosovë Serbi”, ka thënë ai.

Të premten e ardhshme, Lista Serbe ka vendosur t’i mbajë mbledhjet inauguruese për betimin e kryetarëve të rinj në kohën e njëjtë në të gjitha komunat ku ka fituar.

Muja thotë se deeskalimi i qëndrueshëm që kërkon BE-ja në veri, mund të arrihet pas kthimit të qeverisjes lokale në këtë pjesë.

“Pritet që funksionimi i administratës lokale të sjellë një stabilitet më të madh në terren. Institucionet kosovare duhet të sillen edhe në veri sikurse në secilën pjesë të Republikës dhe mendoj që për zbatimin e rendit dhe ligjit nuk duhet të ketë kompromis”, ka thënë Muja.

Lista Serbe e ka rikthyer pushtetin në veri pas rreth tre vjetëve bojkoti që ua ka bërë institucioneve të Kosovës.