Selakoviq: Vuçiqi nuk tha asgjë kundërthënëse në konferencë me Pahorin

Ministri i Jashtëm i Serbisë, Nikola Selakoviq, i ka dal në mbrojtje presidentit serb Aleksandar Vuçiq për deklaratat që ai i dha në konferencë të përbashkët me presidentin e Sllovenisë, Borut Pahor.

Ministria e Punëve të Jashtme të Sllovenisë ia ka shprehur shqetësimin ambasadorit serb në Lubjanë, Zoran Vlatkoviq, lidhur me deklaratën e Vuçiqit dhe ka shprehur pritshmërinë që Beogradi zyrtar të mos problematizojë qëndrimin e Sllovenisë ndaj Kosovës.

Vuçiqi gjatë konferencës pyeti gazetarët se si t’ia shpjegojë kombit të tij se Serbia po i vë sanksione Rusisë, e jo Sllovenisë. E sipas Vuçiqit, Rusia nuk ka shkelur integritetin e Serbisë dhe të drejtën ndërkombëtare, meqë nuk e ka njohur pavarësinë e Kosovës, ndërkohë që Sllovenia e ka bërë këtë.

Ministri i jashtëm serb Selakoviq për “Tanjug” ka thënë se Vuçiq nuk tha asgjë kundërthënëse në konferencë. Ai ka thënë se Vuçiq thjeshtë vuri në dukje “paprekshmërinë e kufijve të njohur ndërkombëtarisht të shteteve anëtare të OKB-së si një nga parimet themelore të së drejtës ndërkombëtare”.

“Për Republikën e Serbisë, ai parim është i vlefshëm, si në rastin e Serbisë, ashtu edhe në rastin e Ukrainës dhe të çdo shteti tjetër anëtarë të OKB-së të njohur ndërkombëtarisht. Parimi është i qartë, i vendosur dhe universal, ky është edhe qëndrimi i Serbisë dhe ata që nuk e respektojnë gjithmonë do të kërkojnë justifikime dhe do të japim shpjegime të panevojshme për qëndrimet e tyre”, ka thënë Selakoviq.