Profesor i së drejtës ndërkombëtare, Besfort Rrecaj, ka thënë se vizita e zëvendëssekretarit të Shtetit për Menaxhim dhe Burime, Richard R. Verma, e riafirmon angazhimin e Shteteve të Bashkuara të Amerikës karshi Kosovës.
Verma të premten qëndroi në Prishtinë ku pati takimet me presidenten Vjosa Osmani dhe kryeministrit Albin Kurti.
Rrecaj ka thënë se vizita e tij është e një rëndësie të veçantë.
“Vizitë jashtëzakonisht e rëndësishme që e riafirmon angazhimin amerikan karshi Kosovës dhe forcimin e marrëdhënieve afatgjatë, në kuptimin e aspiratave të Kosovës për një partneritet strategjik me SHBA-në dhe krijimin e një raporti special. E rikonfirmon në këtë vorbullën e problemeve ndërkombëtare përkushtimin amerikan për paqe, stabilitet dhe prosperitet në Ballkanin Perëndimor”, ka thënë ai në “60 Minuta” të KTV-së.
Për Dialogun Strategjik mes Kosovës dhe SHBA-së, për të cilin presidentja Osmani njoftoi se do ta nënshkruajnë së shpejti, Rrecaj u shpreh se synon të nisë zhvillime të caktuara politike dhe ekonomike në pajtim me vlerat e SHBA-së.
“Dialogje të tille, SHBA-ja ka me një mori vendesh të tjera. Me Maqedoninë e Veriut e ka nënshkruar në vitin 2022. Këto dialogje strategjike kërkojnë të ngërthejnë dhe nxisin zhvillimet e caktuara politike dhe ekonomike në botë në pajtim me vlerat që i mbron SHBA-ja. Në këtë aspekt pres që ky dialog të fokusohet në tri-katër shtylla kryesore të cilat janë të përcaktuara si shtetet e tjera. Si shtyllë e parë është përqafimi i vlerave që i mbron SHBA-ja dhe bota liberal-demokratike, që fokusohet në sundimin e ligjit dhe të drejtat e njeriut, ekonomi të lirë të tregut. Shtylla ekonomike... në kuadër të politikave shteti më shumë shihet si rregullator dhe jo aktor që është i përfshirë direkt në ekonomi. Shtyllën tjetër që kanë të bëjnë me politika të sigurisë e kështu me radhë”, ka shtuar profesori.
Për marrëdhëniet mes Kosovës dhe SHBA-së nën Qeverinë Kurti, Rrecaj ka deklaruar se Amerikan marrëdhëniet ndërkombëtare i sheh mes popujve dhe jo mes qeverive. Nuk pret që të ketë ndryshime “radikale në politikën e SHBA-së ndaj Kosovës nën administratën Trump.
“Mund të ketë ndryshime në mjetet për realizimin e qëllimeve të caktuara. Në synimin e saj, politika amerikane nuk besoj të ketë ndryshim radikal, si në Kosovë ashtu edhe në krizat nëpër botë”, ka thënë Rrecaj.
