Rekrutimi i guvernatorit, BQK: Nënshkrimi i konfidencialitetit u kërkua për t’i mbrojtur politikat

Banka Qendrore e Kosovës (BQK) ka obliguar të pranishmit në procesin e intervistimit të kandidatëve për guvernator të saj që të nënshkruajnë deklaratën e konfidencialitetit dhe atyre që nuk e kanë respektuar këtë kërkesë, nuk u është lejuar prezenca.

Lëvizja “FOL” ka bërë të ditur të shtunën se përfaqësuesja e saj ka refuzuar që ta nënshkruajë këtë deklaratë dhe se për këtë arsye, asaj i është pamundësuar që ta monitorojë intervistimin.

Në reagimin e “FOL” thuhet se nënshkrimi i deklaratës do ta detyronte atë që vlerësimin e saj për këtë proces ta ndante fillimisht me kryetarin e komisionit, dhe të mos publikonte asnjë deklaratë rreth procesit pa lejen e kryesuesit të panelit.

Mirëpo, zëdhënësi i BQK-së, Kushtrim Ahmeti, ka thënë të martën për KOHËN se kërkesa për nënshkrimin e formën së konfidencialitetit është bërë për shkak të ndjeshmërisë së procesit për rekrutimin e guvernatorit.

Sipas tij, gjatë intervistimit mund të diskutoheshin politikat e ardhshme që mund të ndikojnë në sektorin financiar dhe ekonomik.

“Duke pasur parasysh ndjeshmërinë e procesit për rekrutimin e Guvernatorit/es të BQK-së dhe pritshmërinë që gjatë intervistave mund të diskutohen opsionet e politikave të ardhshme dhe informacione të tjera me konfidencialitet të lartë që mund të ndikojnë në sektorin financiar dhe ekonominë, të gjithë të pranishmëve në sallën e intervistave u është kërkuar të nënshkruajnë formën e konfidencialitetit”, ka thënë Ahmeti.

Ai ka shtuar se paneli i intervistuesve i ka miratuar kërkesat nga palë të tjera për monitorim të procesit dhe se të njëjtat palë janë njoftuar paraprakisht se çka do të duhet të nënshkruajnë.

Edhe Arbëri 21 jan 2023 “Fol”: BQK-ja na ndaloi ta monitoronim procesin e rekrutimit të guvernatorit

“Të njëjtave si më sipër, u janë dërguar ftesat, orari i intervistimit dhe numrin e lejuar të pjesëmarrësve që mund të dërgojnë ato për monitorim të intervistave, si dhe u është dërguar procedura dhe forma e lartcekur që duhet nënshkruar. Ditën e fillimit të intervistave, është paraqitur vetëm një përfaqësues i një prej organizatave si më sipër. Megjithatë, i njëjti përfaqësues, për dallimin nga të gjithë të pranishmit e tjerë në sallën e intervistave nuk ka pranuar të respektojë/përmbushë kërkesat unike të përcaktuara nga Paneli (nënshkrimin e formës së konfidencialitetit), gjë që ka bërë që t’i kufizohet prezenca sipas miratimit paraprak”, është shprehur Ahmeti.

BQK-ja ka hapur konkurs për pozitën e guvernatorit në nëntor të vitit 2022. Sipas shpalljes, emërimi do të jetë për një mandat pesëvjeçar duke filluar më 29 mars 2023 ose në datën e emërimit.