Ish-kryetari i Komisionit Qendror të Zgjedhjeve, Mazllum Baraliu, ka komentuar reagimet e Ambasadës amerikane dhe OSBE-së në lidhje me mosmiratimin e kandidatëve për deputetë të Listës Serbe nga ana e anëtarëve të KQZ-së.
Baraliu në emisionin “Interaktiv” në KTV, ka thënë se diplomatët janë për të kryer detyrat e tyre në avancimin e marrëdhënieve mes shteteve, por nuk kanë të drejtë të qasen në këtë mënyrë pasi ata nuk janë gjyqtarë.
Sipas Baraliut këtë çështje në fund megjithatë e vendosë PZAP-ja dhe instancat e tjera të përcaktuara.
“Nuk janë diplomatët gjyqtarë e as kujdestarë, ata janë të demokracisë. As OSBE-ja e as kushdo tjetër. Ata janë për t’i kryer detyrat e tyre diplomatike në avancimin, kultivimin e përparimin e marrëdhënieve në një shtet tjetër. Marrëdhëniet tona me SHBA-në janë të një aleance të dëshmuar prandaj ata kanë të drejtë të deklarojnë por jo kështu të intervenojnë sepse nuk është fundi i botës. Po flas parimisht për zbatimin e ligjit e kushtetutës. Në funksionimin demokratik askush s’ka të drejtë as nga brenda e as nga jashtë të intervenojë sepse është një organ tjetër në këtë rast PZAP-ja, ku kanë të drejtë të gjitha subjektet politike t’i adresojnë pakënaqësitë”, ka thënë Baraliu.
Ish-kryetari i KQZ-së ka deklaruar po ashtu se është e drejtë beteja politike që mund të zhvillohet dhe një gjë të tillë e lejon kushtetuta dhe ligji. Ai shtoi se në fund e vendosin organet kompetente nëse ka ndonjë shkelje.
Më 31 janar, KQZ-ja shpalli rezultatet përfundimtare të zgjedhjeve të parakohshme parlamentare të 28 dhjetorit. Por, gjatë mbledhjes, anëtarët e Komisionit miratuan listat e kandidatëve të të gjithë partive, përveç Listës Serbe – partisë kryesore të serbëve në Kosovë që ka mbështetjen e Beogradit.
Tre anëtarë të KQZ-së votuan për, dy kundër nga Lëvizja Vetëvendosje, dhe anëtarët tjerë abstenuan.
Megjithatë Lista Serbe më 2 shkurt u ankua në Panelin Zgjedhor për Aneksa dhe Parashtresa për këtë vendim të KQZ-së.