Prej një muaji, jashtë funksionit aparatura për trajtimin e grave me kancer gjenital

Ka katër javë që rreth 30 gra me kancer nuk kanë mundur ta kryejnë rrezatimin e brendshëm, meqë shërbimi i Brahiterapisë është jashtë funksionit. Në Klinikën e Onkologjisë thanë se kompania kontraktuese nuk ka sjellë material radioaktiv, e në kompani nuk treguan arsyen e mosfurnizimit.

Pacientët me kancer kanë mbetur qe rreth një muaj pa një nga shërbimet kryesore të Klinikës së Onkologjisë.

Brahiterapia nuk është funksionale, e pacientë në kushte anonimiteti treguan se kanë mbetur pa e vazhduar trajtimin, përderisa sëmundja po u avancon.

Në SHSKUK përmes një përgjigje të shkurtër, vetëm kanë konfirmuar që aparatura nuk funksionon.

“Kompania që është përgjegjëse për sigurimin e burimit radioaktiv akoma nuk na ka sjellë, ka gati një muaj”, thuhet në përgjigjen e Klinikës së Onkologjisë.

Në këtë klinikë kanë treguar që menaxheri i kontratës për aparaturën e blerë ka dhënë dorëheqje.

Edhe Arbëri 19 maj 2023 Një nga dy aparatet e radioterapisë ndodhet jashtë funksionit

“Menaxheri i kontratës ka dhënë dorëheqje nga puna dhe jemi në proces të zëvendësimit!”, thuhet në përgjigje.

KOHA ka dërguar pyetje te kompania “Medika”, e cila është e kontraktuar për furnizim me material radioaktiv, por nuk ka ofruar përgjigje.

Brahiterapia konsiderohet si shërbim i avancuar i rrezatimit. Aparatura e saj shërben për kryerjen e rrezatimeve të tumoreve gjenitale, por përdoret edhe për kanceret në kokë dhe qafë, lëkurë, mushkëri e organe të tjera. Megjithatë, në Kosovë aplikohet vetëm te tumoret gjenitale te gratë.

Brahiterapia ka avantazhin e përdorimit të një doze shumë të lokalizuar të rrezatimit, meqë përveç pjesës së lokalizuar ku është kanceri ruan qelizat e shëndosha.

Qe një muaj prej kur nuk funksionon ky shërbim, pacientët nuk mund ta marrin as në spitalet private në Kosovë, për shkak që asnjëra nga to nuk e ofron këtë shërbim.

Edhe Arbëri 12 sht 2026 Terapia për trajtimin e kancerit të prostatës mungon në Onkologji që nga maji

KOHA ka mësuar që janë rreth 30 gra që do të duhej të rrezatoheshin me këtë aparaturë.

Ka tri javë prej kur Ministria e Shëndetësisë përmes një postimi në Facebok ka njoftuar se janë hequr listat e pritjes për rrezatime të jashtme, por ndonëse aparatura për rrezatim të brendshëm ishte jashtë funksionit në po të njëjtën ditë, kjo gjë nuk është potencuar nga ky institucion.