Terapia për trajtimin e kancerit të prostatës mungon në Onkologji që nga maji

Pacientët me kancer të prostatës po detyrohen ta blejnë vetë një nga terapitë që u nevojitet për trajtim. Edhe terapia Bikaderi, që prej muajit maj mungon në Klinikën e Onkologjisë. Mungesën disamuajshe të kësaj terapie, njohës të shëndetësisë e lidhin me planifikimin dhe vonesat në procedurat e prokurimit.

Bikaderi është terapi hormonale që përdoret në trajtimin e kancerit të prostatës. Por kjo terapi ka muaj që mungon në Klinikën e Onkologjisë.

Pacientët që përballen me këtë sëmundje, tashmë detyrohen që edhe këtë ilaç ta sigurojnë vetë.

Një familjar i një pacienti i ka thënë KOHËS se terapia mungon në Klinikën e Onkologjisë që nga muaji maj.

“Shuma për me e siguru nuk është edhe aq e madhe, po përderisa ka pas në klinikë e tash nuk ka, është bërë e tepërt. Prej majit mungon, çmimi prej barnatore në barnatore dallon, diku 70 euro e diku 80 çdo muaj po kushton”, ka thënë një familjar i një pacienti.

E mos-hapja me kohë e tenderëve, sipas njohësit të shëndetësisë, Vlorjan Molliqaj, tregon se problemet me furnizimin nuk janë thjesht të rastësishme, por lidhen me mangësi në planifikimin dhe menaxhimin e barnave.

Edhe Arbëri 26 tet 2026 Onkologjia që dy javë pa albuminë dhe filgrastim

“Kur tenderët hapen me vonesë, apo dështojnë për shkak se buxheti i planifikuar nuk përputhet me çmimet reale të tregut, kjo tregon qartë se nevojat nuk janë parashikuar dhe proceset nuk janë nisur me kohë. Në Onkologji, çdo vonesë apo ndërprerje e terapisë mund të ketë pasoja të drejtpërdrejta në efektivitetin e trajtimit dhe, në raste të caktuara, edhe në ecurinë e sëmundjes. Prandaj, mungesa e barnave për pacientët me kancer nuk mund të trajtohet si një çështje e zakonshme administrative apo procedurale”, ka thënë Molliqaj.

Sipas Molliqajt, SHSKUK-ja duhet të planifikojë më herët dhe më saktë procedurat e prokurimit, në mënyrë që dështimet e tilla të mos përsëriten.

“Nevojitet një planifikim shumë më i saktë i nevojave, nisje më e hershme e procedurave të prokurimit, mekanizma të përshpejtuar për sigurimin e barnave jetike dhe krijimi i një rezerve shtetërore që garanton furnizim për disa muaj. Është e papranueshme që pasojat e dështimeve në sistemin publik t’u barten pacientëve dhe familjeve të tyre, duke i detyruar ata që terapinë e domosdoshme ta blejnë me mjetet e veta. Përgjegjësia për sigurimin e vazhdimësisë së trajtimit duhet të jetë e sistemit, jo e pacientit”, ka vlerësuar Molliqaj.

KOHA i ka dërguar pyetje Shërbimit Spitalor Klinik dhe Universitar të Kosovës lidhur me procedurat e prokurimit për këtë terapi, si dhe se kur pritet të furnizohet Klinika e Onkologjisë me Bikader, por deri në publikimin e këtij raporti nuk ka marrë përgjigje.

Edhe Arbëri 21 tet 2026 Vdes pacientja me kancer të gjirit që mbeti katër muaj pa terapi

KOHA ka raportuar vazhdimisht gjatë muajve të fundit për mungesat e barnave në Klinikën e Onkologjisë dhe vonesat në procedurat e prokurimit për shumicën e terapive që kanë munguar në këtë klinikë.

Në Onkologji, pacientët janë përballur edhe me mungesa të terapive, blerja e të cilave nga ana e tyre ka kushtuar deri në 5 mijë euro.